“O‘zbekneftgaz” xalqaro reytingdan joy olish uchun Fitch Ratings Ltd bilan shartnoma tuzgani maʼlum bo‘ldi.
Davlat xaridlari elektron portalida “O‘zbekneftgaz” AJ va Fitch Ratings Ltd o‘rtasida 195 ming dollarlik shartnoma tuzilganini ko‘rish mumkin.
Portalda hujjat 2024-yil 11-mart kuni imzolangani, uni tuzishdan maqsad emitent va emitent tomonidan chiqarilishi mumkin bo‘lgan qimmatli qog‘ozlar (obligatsiya) uchun ochiq reytinglar taqdim etilishi ekani yozilgan.
Fitch Ratings korporativ va suveren kredit reytinglarini belgilash, kreditga layoqatlilikni baholash va risklarni tahlil qilish bilan shug‘ullanadi.
Investitsiyalashda obligatsiyalar reytingi kompaniya yoki hukumatning kreditga layoqatliligini baholash hisoblanadi. Kredit reytingi obligatsiyalar kabi qarz qimmatli qog‘ozlariga potensial investorlar uchun moliyaviy ko‘rsatkich bo‘ladi. “BBB” dan past bo‘lgan obligatsiyalar reytinglari investitsiyalar uchun xavfli deb topiladi.
“O‘zbekneftgaz” 2021-yildan beri mazkur agentlikdan xalqaro kredit reytinglarini olib kelmoqda. Xususan, 2022-yil 23-sentyabrda Fitch Ratings “O‘zbekneftgaz” kredit reytingi bo‘yicha hisobot eʼlon qilgan. Unga ko‘ra, kompaniyaning kredit reyting bahosi “BB” (barqaror) darajada tasdiqlangan. 2023-yilda ham bu baho o‘zgarishsiz qoldirilgan.
Fitch “O‘zbekneftgaz” kredit reytingiga barqarorlik bahosi berilishiga sabab sifatida uning to‘liq davlatga tegishli ekanini keltirgan. Agentlik tahlilida kompaniya olayotgan qarzlar (kreditlar) davlat tomonidan kafolatlanishi va hukumat “O‘zbekneftgaz”ni juda kuchli qo‘llab-quvvatlashiga alohida urg‘u berilgan.
“2022-yil oxirida kompaniya jamlangan qarzining taxminan 65 foizi davlat tomonidan kafolatlangan. Qo‘llab-quvvatlashning boshqa shakllariga “O‘zbekneftgaz” tomonidan undiriladigan liberallashtirilgan neft mahsulotlari narxlari, soliq imtiyozlari va kamaytirilgan dividendlar kiradi”, — deya qayd etgan reyting agentligi.
Izoh (0)