2023-yil 4-iyul kuni to‘qimachilik sohasidagi talabgir kasblar bo‘yicha Germaniyadagi dual o‘qitish tajribasiga tayanib ishlab chiqilgan umumiy ta’lim dasturlari hukumat, ish beruvchilar va metodist-pedagoglardan iborat steykxolderlarga taqdim etildi.
Ushbu yangi ta’lim dasturlari Germaniya xalqaro hamkorlik tashkiloti (GIZ) loyihasi doirasida ta’limni tashkil qilish bo‘yicha mutaxassislar, sanoat korxonalari vakillari va o‘qituvchilardan tarkib topgan maxsus ishchi guruhlari tomonidan o‘tgan olti oy davomida yaratilgan edi. Bunda ishchi guruhlar GOPA global konsalting kompaniyasining germaniyalik xalqaro ekspertlari jamoasi ko‘rsatmalariga tayangan. Yangicha “dual” yondashuv O‘zbekistondagi kasb-hunar maktab/kollej va texnikumlarida hamda sanoat korxonalarida o‘zaro kelishuv asosida kasbga o‘qitishni ko‘zda tutadi.
“Germaniya – dual kasb-hunar ta’limi bo‘yicha dunyodagi yetakchi mamlakat. “Dual” so‘zi ta’lim ikkita joyda tashkil etilishini anglatadi, ya’ni ham kasb-hunar maktabida, ham sanoat korxonasida. Ha, o‘quvchilar ishni faqat sinfxonalarda emas, kelgusi voqelikda bevosita ishlaydigan korxonalarida amaliy ravishda o‘rganishlari muhim”, - deydi GOPA konsultanti Bianka Yeneke. “Xalqaro tajribada dual o‘qitishning 30 foizi ta’lim muassasasida, 70 foizi esa ishlab chiqarish korxonasida o‘tkazilishi me’yori mavjud”.
Tadbirda Oliy ta’lim, fan va innovatsiyalar vazirligi, Pedagogik innovatsiyalar instituti, “O‘zto‘qimachiliksanoat” uyushmasi, to‘qimachilik korxonalarining kasbiy malaka bo‘yicha tarmoq kengashlari, ish beruvchi korxonalar vakillari, ekspertlar va boshqa mahalliy muassasalar mutaxassislari ishtirok etdi.
Ishlab chiqilgan asosiy kasbiy ta’lim dasturlari mualliflari Toshkent to‘qimachilik va yengil sanoat instituti dotsentlari va Pedagogik innovatsiyalar instituti metodistlaridir. Mualliflar bunda bevosita o‘quvchilarga ta’lim beradigan pedagoglar, sanoat korxonalaridagi ustoz va instruktorlar hamda loyihaning siyosiy hamkori bo‘lmish OTFIV vazirligi vakillari takliflarini ham hisobga olgan.
Amaliy mashg‘ulotlar orqali kompetensiyalarni shakllantirishga qaratilgan mazkur yangicha tizim bo‘yicha 15ta o‘quv muassasasi 2023-2024 o‘quv yilidan boshlab tajriba-sinov sifatida kasbga o‘qita boshlaydi.
Ma’lumot uchun, ta’lim dasturlari ishlab chiqish GIZning “O‘zbekistonda kasb-hunar ta’limi tizimidagi islohotlar va modernizatsiya jarayonlarini qo‘llab-quvvatlash” nomli kattaroq loyihaning bir qismidir.
Dasturlar ishlab chiqishdan avval ushbu loyiha doirasida bandlik vazirligi mehnat bozorida eng talabgir deb topilgan quyidagi oltita kasb bo‘yicha professional standartlar ishlab chiqqan edi: tikuvchi, ip yigiruvchi, tikuvchilikda andozalar tayyorlovchi, elektron texnika asboblarini sozlovchi, to‘qimachilik korxonalari qurilmalari montajchisi, to‘qimachilik sohasida texnik-texnolog.
GIZ, shuningdek, O‘zbekistonda yangi “dual” o‘qitishni sinovdan o‘tkazish uchun tanlab olingan 15ta kasb-hunar maktab/kollej va texnikumlarni zamonaviy jihozlar bilan ta’minlamoqda.
Qolaversa, xalqaro loyihaning yana bir ajralmas qismi – hududlarda o‘quvchi va ota-onalar orasida kasbga yo‘naltirish va kasbga yangicha o‘qitish tizimi imkoniyatlari haqida axborot berishdir. Bu yilgi qabul oldidan milliy va xalqaro ekspertlar tomonidan oltita kasb bo‘yicha videoroliklar ham tayyorlangan edi.
Izoh (0)