Fransiya harbiylari Isroilga uchirilgan Eron dronlarini urib tushirgani ma’lum qilindi. Bu haqda Fransiya mudofaa vaziri Sebastyan Lekornuga tayanib, Al Jazeera xabar berdi.
Lekornuning aytishicha, Eron 12 kunlik mojaro davomida Isroil tomon 400 ga yaqin ballistik raketa va 1000 ta dron uchirgan.
“Fransuz armiyasi urushning so‘nggi bir necha kunida Erondan Isroilga uchirilgan 10 tacha dronni yer-havo tizimlari yoki Rafale qiruvchi samolyotlari orqali urib tushirganini tasdiqlashim mumkin”, dedi Lekornu.
Isroil 13-iyun kuni Eronning yadroviy salohiyatini yo‘q qilish maqsadida, unga hujum qilgan. Aviahujumlar oqibatida Eron harbiy qo‘mondonlari va bir nechta yadroviy olimlar halok bo‘lgan. Eron rasmiylariga ko‘ra, hujumda 610 kishi halok bo‘lib, 5 mingga yaqin kishi jarohatlangan. Tehronning javob zarbalarida Isroilda kamida 28 kishi halok bo‘lib, yuzlab binolarga zarar yetgan.
22-iyunga o‘tar kechasi AQSH prezidenti Donald Tramp AQSH qurolli kuchlari Erondagi uchta yadroviy obyekt — Fordo, Natanz va Isfahonga muvaffaqiyatli hujum uyushtirganini ma’lum qilgan. U Tehron mojaroni to‘xtatishga rozi bo‘lishi kerakligini ta’kidlagan.
23-iyun kuni Eron Qatardagi Amerika harbiy bazalariga qarshi operatsiya boshlagan. AQSHning Iroqdagi bazasi ham hujumga uchragan. Qatar o‘z hududidagi harbiy bazaga berilgan zarbalardan so‘ng Eronning harakatlarini qat’iy qoralagan. Mamlakat bevosita javob berishga haqli ekanini bildirgan. Qatarning bayonotini Saudiya Arabistoni ham qo‘llab-quvvatlagan. Shundan so‘ng, Yaqin Sharqdagi mojaro kuchayishi sababli bir qator davlatlar o‘z havo hududini yopgan. 24-iyun kuni Isroil va Eron o‘rtasida o‘t ochishni to‘xtatish bo‘yicha sulh kuchga kirgan.
Izoh (0)