Eron hukumati Fransiya, Buyuk Britaniya va Germaniya vakillari bilan Eronning yadroviy dasturi bo‘yicha Qo‘shma keng qamrovli harakatlar rejasiga qaytish bo‘yicha muzokaralar olib borishga tayyor. Bu haqda PressTV telekanaliga tayanib “TASS” xabar berdi.
Telekanal ma’lumotlariga ko‘ra, Eron Fransiya, Buyuk Britaniya va Germaniyaga o‘z vakillarini Tehronga yuborishini yoki bu uch davlat poytaxtlariga eronlik diplomatlarni yuborishni taklif qilgan. Qayd etilishicha, Eron tomoni hozirgi kungacha hech qanday javob olmagan.
Eron tashqi ishlar vaziri o‘rinbosari Ali Bageriy 27-oktabr kuni Bryusselda Yevropa Ittifoqi tashqi ishlar xizmati bosh kotibi o‘rinbosari, yadroga oid Qo‘shma harakatlar rejasi bo‘yicha qo‘shma komissiya koordinatori Enrike Moro bilan muzokaralar o‘tkazishi kutilmoqda. 14-oktabr kuni ular Tehronda uchrashib, yadroviy kelishuvga qaytish muammosini muhokama qilgandi, shuningdek, maslahatlashuvlarni Bryusselda davom ettirishga kelishib olingan.
Avvalroq Oq uy vakili Jeyk Sallivan agar Eron yadroga oid Qo‘shma harakatlar rejasiga diplomatik yo‘l bilan qaytmasa, AQSh boshqa choralar ko‘rishi mumkinligidan ogohlantirgandi. Undan avval AQSh Davlat kotibi Entoni Blinken yadroviy bitim bo‘yicha qaror qabul qilish navbati Eronda qolganini, ammo AQSh uni uzoq kutmasligini aytgan.
“Ular (eronliklar) uch oydan buyon muzokara o‘tkazmadi. Ularda saylovlar bo‘lib o‘tdi, yangi hukumat tuzildi, lekin ular muzokaralarni davom ettirmadi. Demak, haligacha qaror qabul qilinmagan va to‘p ular tomonda qolmoqda, lekin bu uzoq davom etmaydi ”, — dedi Blinken.
Aprel oyidan buyon Vena shahrida Eron va xalqaro “beshlik” (Rossiya, Buyuk Britaniya, Germaniya, Xitoy va Fransiya) o‘rtasida Eron yadroviy bitimini asl shaklida tiklash bo‘yicha muzokaralar olib borilmoqda. Tomonlar Amerikaning Islom Respublikasiga qo‘ygan sanksiyalarini bekor qilish, yadroviy sohadagi majburiyatlarini bajarish, shuningdek, AQShning bitimga qaytishini muhokama qilmoqda. Shartnomaga a’zo davlatlar vakillari, shuningdek, Eron ishtirokisiz Amerika elchilari bilan alohida maslahatlashuvlar o‘tkazmoqda. Dastlab delegatsiyalar ishni may oyining oxirida, keyin iyun oyining boshida yakunlashga umid bildirgandi.
Izoh (0)