Jizzaxda fermer xo‘jaligi xodimi o‘sishdan to‘xtamagan 42 tup qayrag‘ochni kesib tashladi. Bu haqda Jizzax viloyati Ekologiya boshqarmasi matbuot xizmati xabar berdi.
Ma’lum qilinishicha, 11-yanvar kuni Jizzax viloyati Ekologiya, atrof-muhitni muhofaza qilish va iqlim o‘zgarishi boshqarmasining Paxtakor tuman ekologiya inspeksiyasi tomonidan Paxtakor tumani “Baxmal” SIU hududida joylashgan “Yuvest tog‘” fermer xo‘jaligining dala maydoni chetiga ixota maqsadida ekilgan 42 tup o‘sishdan to‘xtamagan qayrag‘och kesib ketilgani aniqlangan.
O‘rganishlar davomida daraxtlar “Yuvest tog‘” fermer xo‘jaligi ish yurituvchisi, Paxtakor tumani “Bog‘ishamol” QFY yashovchi 36 yoshli J.J. ismli fuqaro tomonidan kesib olingani maʼlum bo‘lgan.
Vazirlar Mahkamasining “Davlat o‘rmon fondiga kirmaydigan daraxt va butalarni ekish, parvarish qilish va ulardan foydalanish talablarini yanada takomillashtirish to‘g‘risida”gi qaroriga asosan qayrag‘och daraxtlarining noqonuniy kesilishi natijasida o‘simlik dunyosiga 224 million 400 ming miqdorida zarar yetkazilgan.
Paxtakor tumani prokuraturasining qaroriga ko‘ra, fuqaro J.J.ga nisbatan Jinoyat kodeksining 198-moddasi ( ekinzorlarni, o‘rmonlarni, daraxtlarni yoki boshqa o‘simliklarni shikastlantirish yoxud nobud qilish) 2-qismi bilan jinoyat ishi qo‘zg‘atilgan. Hozirda tergov ishlari davom etmoqda.
Avvalroq Qashqadaryoda kanal qirg‘og‘ini rekonstruksiya qilish vaqtida 150 ta daraxt qo‘porib tashlangani, Xorazm viloyati Shovot tumanida daraxtlar kesib, yoqib yuborilishi oqibatida 756 million so‘m zarar yetkazilgani to‘g‘risida xabar berilgandi. Shuningdek, Sirdaryoda ariqlarni betonlashtirish jarayonida tabiatga 232 million so‘m zarar yetkazilgan edi.
Izoh (0)