Shotlandiyadagi butun boshli orol vayron bo‘lgan qasr bilan birga 7,5 million dollarga sotuvga qo‘yildi. Bu haqda CNN xabar berdi.
Shotlandiyaning g‘arbiy sohilida joylashgan Shuna oroli 80 yil ichida birinchi marta sotilmoqda. Aytilishicha, har yili bir qator Shotlandiya orollari sotiladi, ammo Shuna o‘zining 1 100 akr maydoni bilan ajralib turadi.
Shotlandiyada ko‘plab kichik xususiy orollar mavjud bo‘lsa-da, ularning aksariyatiga borish juda qiyin. Shuna oroli esa bundan mustasno. Unga Glazgo aeroportidan atigi 30 daqiqada vertolyot bilan yetib olish mumkin.
Hozirda orolda 8 ta turar joy mulki mavjud bo‘lib, ulardan 7 tasi rekreatsion maqsadlarda ishlatiladi. Shuningdek, hududda XX asr boshlarida yangi zelandiyalik sarguzashtchi va askar Jorj Bakli tomonidan qurilgan qal’a xarobalari ham bor.
Orolda o‘rmon, yaylov, bog‘lar, shuningdek, toshli qirg‘oq va qumli plyajlar ham mavjud. Potensial xaridorlar oroldan dam olish, ekoturizm yoki sport maskani sifatida foydalanishi mumkin.
Izoh (0)