Rossiyalik olimlar Kaspiy dengizining shimoliy qismida suv sathining pasayishi natijasida yangi orol paydo bo‘lganini tasdiqlashdi. Bu haqda Rossiya fanlar akademiyasining Shirshov nomidagi Okeanologiya instituti matbuot xizmati ma’lum qildi.
Rossiya Fanlar akademiyasi Okeanologiya instituti, uning Kaspiy filiali va Astraxan davlat qo‘riqxonasining Shimoliy Kaspiyga uyushtirgan keng qamrovli ekspeditsiyasi davomida olimlar Kichik Marvarid orolidan 30 km janubi-g‘arbda yangi orol mavjudligini tasdiqlashga erishgan. Dastlab, sayozlikning qurib qolishi 2024-yil noyabr oyida Okeanologiya institutining Kaspiy filiali xodimlari tomonidan kosmik suratlarda aniqlangan, biroq orolning mavjudligi masalasi yaqin vaqtgacha bahsli bo‘lib kelgan.
Xabarda aytilishicha, yangi kashf etilgan orol Kaspiy dengizi sathining pasayishi va O‘rta Marvarid sayozligining yuzaga chiqishi natijasida paydo bo‘lgan.
Ma’lum qilinishicha, ekspeditsiya orolning shimoliy qismiga yaqinlashishga erishgan, biroq atrofdagi sayozliklar va ob-havo sharoitlari tufayli qirg‘oqqa chiqish imkoni bo‘lmagan. Shunday bo‘lsa-da, orol kvadrokopterdan olingan tasvirlarda aniq ko‘rinib turibdi. Yaqin kunlarda olimlar yangi orolning dastlabki tavsifini yaratib, uning geografik nomlanishi bo‘yicha takliflar tayyorlamoqda.
“Hozirgi paytda, Volga daryosining suv toshqini cho‘qqisidagi maksimal oqim davrida orol dengiz sathidan biroz balandroq quruqlikni tashkil etadi. Aniq ko‘rinib turibdiki, suv sathi eng past bo‘lgan paytda orolning suv yuzasidan ko‘tarilishi yanada sezilarli bo‘ladi. Tekshiruv paytida orol yuzi qum tepaliklari bilan murakkablashgan nam tekislikdan iborat edi”, deyiladi institut xabarida.
Qayd etilishicha, Kaspiy dengizi sathining yanada pasayishi natijasida bu orol yaqin yillarda o‘z maydonini sezilarli darajada kengaytirishi va noyob qush turlarining in qurish joyi hamda Kaspiy tyulenlarining yotog‘i sifatida katta ahamiyat kasb etishi mumkin.
Izoh (0)