Vazirlar Mahkamasining qarori bilan Qoraqalpog‘iston Respublikasida joylashgan davlat mulki obyektlarini elektron tanlov asosida eng yaxshi taklif bildirgan talabgorga investitsiya kiritish majburiyatlari bilan sotish tartibi to‘g‘risidagi nizom tasdiqlandi, deb xabar beradi Norma.
Ommaviy savdolarga chiqarilgan davlat mulki obyektlari uch oy muddatda sotilmagan taqdirda, ular “E-auksion” elektron savdo platformasida tanlov asosida eng yaxshi taklifni bildirgan talabgorga investitsiya kiritish majburiyatlari bilan sotiladi.
Hujjatda quyidagi tartib belgilanadi:
- davlat mulki obyektlari bo‘yicha investitsiya majburiyatlari miqdorini aniqlash tartibi;
- tanlov natijalarini rasmiylashtirish va davlat mulki obyektini sotish bo‘yicha oldi-sotdi shartnomasini tuzish tartibi.
Davlat mulkini sotish uchun tanlovni tashkil etishda quyidagilar majburiy ravishda ko‘rsatiladi:
- investitsiya miqdori;
- investitsiya kiritish muddati;
- davlat mulki obyektining yangi boshlang‘ich narxi miqdori.
Hujjat Qonun hujjatlari maʼlumotlari milliy bazasida eʼlon qilingan va 2023-yil 28-noyabrdan kuchga kirdi.
Avvalroq prezident qarori bilan mamlakatdagi 20 ta vazirlik va idoralarda yangi investitsiya loyihalarini ishlab chiqish va amalga oshirish bo‘yicha “loyiha ofislari” tashkil etilgandi. Shuningdek, Toshkent shahri hokimligi muassisligida davlat va tadbirkorlik subyektlari o‘rtasida “ko‘prik” vazifasini bajaruvchi “Toshkent Invest kompaniyasi” aksiyadorlik jamiyati tashkil etilayotgani to‘g‘risida xabar berilgandi.
Izoh (0)