10-iyul kuni Sothebyʼs auksionida fransuz kinematografiyasi timsoli Jeyn Birkinga tegishli bo‘lgan Hermes Birkin original sumkasi sotiladi. Bu haqda The New York Times yozmoqda.
Dastlab Hermes Birkin Manhettendagi kimoshdi savdo uyida namoyish etiladi, keyin esa Parijga olib boriladi. Sumka Paris Fashion Iconsʼda sotiladi.
Afsonaviy aksessuar 1984-yilda Birkin uchun maxsus ishlab chiqarilgan. Aktrisa sharafiga nomlangan aynan shu sumka boshqa barcha Birkinʼlarning prototipiga aylandi.
Ushbu sumkaning yaratilishi hikoyasi moda tarixiga kirdi. Aktrisa Parijdan Londonga Air France samolyotida uchayotganda, uning yonidagi o‘rindiqdagi inson o‘sha paytda Hermes rahbari bo‘lgan Jan-Lui Dyuma bo‘lib chiqdi. Birkin sumkalar o‘rniga shaxsiy narsalarini olib yurish uchun oddiy savatdan foydalanishni afzal ko‘rardi. Bir payt u o‘z o‘rindig‘iga o‘tirayotganida savat ichidagi narsalari to‘kilib ketdi. Shu asnoda aktrisa va Hermes rahbari tanishib qolishdi va suhbat davomida unga kerakli narsalarning hammasi sig‘adigan sumka kerak, degan qarorga kelishdi. Shunday qilib hozirga qadar eng mashhur sumka dizayni parvoz paytida yaratildi.
“Shubhasiz, bu o‘ziga xos yagona nusxa bo‘lib, boshqa Birkinʼlarga umuman o‘xshamaydi. Biz muntazam ravishda kimoshdi savdolarida Birkin sumkalari bilan savdo rekordlarini yangilab kelmoqdamiz. Biz bu buyum malika Diananing sviteri yoki NBA maykasi kabi o‘ziga xoslikni ko‘rsatishini taxmin qilmoqdamiz”, deydi Sothebyʼs sumkalar va moda yo‘nalishi rahbari Morgan Halimi.
Birkin narxi potensial xaridorlarga “xususiy tartibda” aytiladi, dedi Halimi. Uning fikricha, sumka yangi rekordni yangilashi mumkin.
Asl sumka hozirda sotuvda bo‘lgan zamonaviy Birkinʼlardan biroz farq qiladi. Uning o‘lchami kattaroq bo‘lib, olinmaydigan tasmasi va boshqa ishlab chiqaruvchining ichki chaqmog‘i bor. Sumka to‘plamida aktrisa tashqarida osib qo‘ygan tirnoq qisqichlari ham bor.
Aktrisaning hammasi bo‘lib beshta Birkin sumkasi bor edi. U o‘zining Birkinʼlarini avaylamasligi, shuningdek, ularni stikerlar va bezaklar ila qoplashi bilan mashhur edi.
Jeyn Birkin 1946-yil 14-dekabrda Londonda tug‘ilgan. Uning karyerasi Mikelanjelo Antonioning “Suratga olishga qiziqish” va Jek Smitning “Kaleydoskop” filmlarida rol o‘ynaganidan keyin o‘sdi. Keyinchalik u 80 dan ortiq filmlarda rol o‘ynadi va 20 ta musiqiy albom chiqardi. Aktrisa 2023-yilda 76 yoshida vafot etdi.
Izoh (0)