“Do‘stlar” serialidagi Chendler Bing obrazi bilan tanilgan amerikalik aktyor Mettyu Perrining hashamatli uyi sotuvga qo‘yildi. Marhum aktyor xonadonni o‘limidan uch oy avval xarid qilgan.
Gollivud tepaliklarida joylashgan ko‘chmas mulk umumiy maydoni 900 kvadrat metrni tashkil qiladi. Unda uchta yotoqxona va to‘rtta hammom mavjud. 54 yoshli aktyor mazkur uyda yashashga ulgurmagan. Perri o‘tgan yilning oktyabr oyi oxirida baxtsiz hodisa tufayli vafot etdi. Uning o‘limiga ketamin dori vositasining nojo‘ya taʼsiri sabab bo‘lgan.
Mettyu Perri hashamatli uylarni yaxshi ko‘rar va o‘ziga yoqqan mulklarni sotib olardi. Aktyor o‘zining birinchi uyini 1994-yilda “Do‘stlar” serialining premyerasidan bir yil o‘tgach xarid qildi. U muvaffaqiyatli sitkom yulduzlari serialning birinchi mavsumidan keyin doim yangi xonadon sotib oladi, deb hazillashgan edi.
O‘limidan avval Mettyu Perri moliyaviy muammolarga duch kelmagan bo‘lsa-da, to‘satdan ko‘chmas mulklarini sotuvga qo‘ygandi.
Aktyor “Shoshsang — kulgiga qolasan”, “Uch kishilik tango”, “Firibgarlar” kabi filmlarda ham suratga tushgan. 2022-yilda Perri o‘zining “Do‘stlarim, yaqinlarim va yana bir juda yomon narsa” nomli avtobiografik kitobini nashr etgan, unda giyohvandlik bilan kurashgan yillari tasvirlangan.
Foto: Entertainment Weekly
Izoh (0)