O‘zbekistonda 500 ming gektardan ziyod hududga chigirtka tarqalgani aniqlandi, deb xabar bermoqda Qishloq xo‘jaligi vazirligi huzuridagi O‘simliklar karantini va himoyasi agentligi.
19-iyun holatiga ko‘ra, 875 ming 87 gektarda monitoring olib borildi. 515 ming 830 gektarda chigirtka tarqalgani aniqlandi. 507 ming 181 gektarda kimyoviy kurash tadbirlari o‘tkazildi.
Asosiy tadbirlar Qoraqalpog‘iston Respublikasi, Xorazm, Buxoro, Navoiy, Sirdaryo, Toshkent viloyatlarida davom etmoqda. Yuqorida qayd etilgan hududlarda saksovul bukri chigirtkasiga qarshi kimyoviy ishlovlar olib borilmoqda.
Qashqadaryo, Surxondaryo, Samarqand, Jizzax, Andijon, Namangan va Farg‘ona viloyatlarida asosiy o‘choqlar bartaraf etildi. Chigirtka va tut parvonasiga qarshi kurash xizmati 24/7 rejimida faoliyat olib bormoqda. Erta tongda va kechki vaqtda kimyoviy kurashlar olib borilib, kunduzi monitoring o‘tkazilishi yo‘lga qo‘yilgan.
Qayd etilishicha, murojaatlar 1288 yoki 71 202 10 00 telefon raqamlari orqali kun-u tun qabul qilinmoqda. Kimyoviy ishlovlar olib borilishi va preparatlar bepul.
Qozog‘iston, O‘zbekiston va Qirg‘iziston chigirtkalarga qarshi kurashish bo‘yicha kuchlarni birlashtirib, mintaqaviy xavfsizlikni ta’minlash yo‘lida hamkorlikni yo‘lga qo‘ymoqda.
O‘zbekistonda 2025-yilda 608 ming gektar maydonda chigirtka tarqalishi prognoz qilingan. Biroq iqlim o‘zgarishi, yil sayin havo haroratining oshib borayotgani zararli chigirtkalar maydoni kengayishiga olib kelishi mumkin. Chigirtka bosqini bilan bog‘liq barcha murojaatlarni o‘z vaqtida bartaraf etish maqsadida hududlarda tezkor shtablar tashkil etilib, chigirtka xizmati 24/7 rejimiga o‘tkazilgan.
Izoh (0)