Sport olamining chinakam afsonasi, o‘zbek gimnastikasining faxri — Oksana Chusovitina 50 yoshni qarshiladi. Sakkiz marta yozgi Olimpiya o‘yinlarida ishtirok etib, Ginneslari rekordi kitobiga kiritilgan ushbu gimnastikachi 1975-yilning 19-iyunida Buxoro viloyatida tug‘ilgan.
U 1991-yildan boshlab xalqaro sport maydonlarida sobiq SSSR tarkibida ishtirok etishni boshlagan. 1992-yilda Barselonada bo‘lib o‘tgan Olimpiadada MDH nomidan qatnashib, jamoaviy bahslarda oltin medal qo‘lga kiritgan. O‘shanda u atigi 17 yoshda edi.
Chidamlilik, fidoyilik va sadoqat timsoli
Chusovitinaning sportdagi uzoq faoliyati — nafaqat jismoniy tayyorgarlik, balki mustahkam irodasi, mehnatsevarligi va sportga bo‘lgan cheksiz muhabbati natijasidir. U faoliyati davomida O‘zbekiston, Germaniya va SSSR terma jamoalari safida qatnashib, ko‘plab medallarni qo‘lga kiritgan. Uning noyob sakrash texnikasi, aniqligi va nafis harakatlari bugungi kunda ham yosh sportchilar uchun ibrat bo‘lib qolmoqda.
U 2000-yil Sidney Olimpiadasidan keyin sport faoliyatini yakunlashi mumkin edi. Chuning Oksananing o‘g‘li Alisherga leykemiya (oqqon) tashxisi qo‘yiladi. 2002-yilda uni davolash maqsadida Germaniyaga ko‘chib o‘tadi. Uning turmush o‘rtog‘i, yunon-rum kurashi bo‘yicha chempion Bahodir Qurbonov esa sportdagi faoliyatini to‘xtatadi.
Alisherning davolanishiga “Kyoln” sport klubi yordam qo‘lini cho‘zadi. Oksana Germaniyada mashg‘ulotlarni davom ettiradi va 2008-yilgi Pekin Olimpiadasida Germaniya terma jamoasi safida kumush medal qo‘lga kiritadi.
O‘sha davrni eslab, Oksana shunday deydi:
“Alisher o‘shanda atigi 3 yoshda edi. Kasallik qayerdan chiqqani noma’lum. Ko‘pchilik o‘g‘limni davolatish uchun mashg‘ulotlarni davom ettirdim deb o‘ylaydi. Aslida esa men sport bilan shug‘ullanmasam, ruhiy jihatdan chidab bo‘lmasdi. Shifoxonadagi bolalar ko‘zlariga qarash og‘ir edi. Sport meni biroz bo‘lsa-da chalg‘itdi.”
Jarohatlar, qaytishlar va yangi umidlar
2008-yildan keyin Oksana bir necha og‘ir jarohat oldi, operatsiyalar o‘tkazdi, lekin sportni tark etmadi. 2012-yil Londonda, 2016-yil Rio-de-Janeyroda, 2021-yil Tokioda bo‘lib o‘tgan Olimpiadalarda qatnashdi. Tokio Olimpiadasiga yo‘llanmani 45 yoshida qo‘lga kiritib, yana bir tarix yaratdi.
“Bu qanday sir?” degan savollarga Oksana oddiy javob beradi:
“Hech qanday sir yo‘q. Hech kim bu qadar uzoq vaqt davomida gimnastikada qolishni xohlamagan, xolos. Men har kuni o‘zimga maqsad qo‘yaman. Meni hech kim majburlamaydi. Bu — chin dildan bo‘lgan qiziqish.”
2024-yilning may oyida Toshkentda bo‘lib o‘tgan saralash musobaqalari oldidan jarohat olib, Parij Olimpiadasida ishtirok eta olmaydigan bo‘ldi. Oksana bu holatni afsus bilan tilga oldi:
“Juda katta tayyorgarlik ko‘rgandim, o‘zimga ishongandim. Afsuski, jarohat meni to‘xtatdi.”
Los-Anjeles sari!
Chusovitina 2028-yilda AQSHning Los-Anjeles shahrida bo‘lib o‘tadigan Olimpiya o‘yinlarida qatnashishni niyat qilgan. 2023-yil kuzida Rossiyada o‘tgan musobaqada g‘olib bo‘lib, bu maqsad sari yana bir qadam tashladi:
“Avvalambor, 2026-yil Osiyo o‘yinlarida ishtirok etishni istayman. Keyin holatimga qarab qaror qilaman. Agar o‘zimni yaxshi his qilsam, Olimpiadaga yo‘llanma olish uchun harakat qilaman.”
Mukofot va e’tiroflar
Bugungi kunda Oksana Chusovitina — O‘zbekiston Respublikasida xizmat ko‘rsatgan sport ustasi, “Mehnat shuhrati” va “El-yurt hurmati” ordenlari sohibi, “O‘zbekiston iftixori” faxriy unvoni bilan taqdirlangan.
Statistika va yutuqlar
- 1992-yil — Olimpiya chempioni (MDH tarkibida)
- 2008-yil — Olimpiya o‘yinlari vitse-chempioni (Germaniya)
- 3 karra jahon chempioni
- 8 karra Olimpiya ishtirokchisi — Ginnes rekordchisi
- Yevropa chempionati g‘olibi (2008)
- Jahon chempionatlarida 8 ta kumush va bronza medali
- Jahon kubogi g‘olibi (2022-yil, tayanib sakrash).
50 yoshda bo‘lishiga qaramay, Oksana Chusovitina sportga bo‘lgan muhabbat, fidoyilik va chidamlilikning tirik timsolidir. U nafaqat o‘zbek sportining faxri, balki butun dunyo sporti tarixida o‘chmas iz qoldirgan afsonadir.
Izoh (0)