Jizzax viloyatining Do‘stlik va Buxoro viloyatining Jondor tumanlarida tabiiy gazdan noqonuniy foydalanish holatlari aniqlandi.
O‘zenergoinspeksiyaning xabar berishicha, Do‘stlik tumanida fuqaro R.Q. o‘z xonadonida tovuq ferma tashkil etib, gaz ta’minoti korxonasi bilan shartnoma tuzmasdan, gazdan noqonuniy foydalanib kelgan.
Ushbu qoidabuzarlik natijasida gaz ta’minoti korxonasiga 1 mlrd 665 mln so‘mlik zarar yetkazilgan.
Hozirda huquqni muhofaza qilish organlari tomonidan tergovga qadar tekshiruv ishlari olib borilmoqda.
“Hududgaztaʼminot” AJning xabariga ko‘ra, Jondor tumanidagi tibbiyot birlashmasidagi gaz jihozlarining sarfi elektron gaz hisoblash uskunasining (EGHU) maksimal quvvatidan oshiqcha ekani aniqlangan.
Holat bo‘yicha dalolatnoma tuzilib, 1 mlrd 113 mln 654 ming so‘mlik zarar qayta hisob-kitob qilindi.
Holat bo‘yicha barcha hujjatlar huquqni muhofaza qiluvchi organlarga yuborildi.
Bunday holatlar soni ortib bormoqda
Samarqand viloyatidagi korxonalardan biri 553 million so‘mlik elektrdan noqonuniy foydalangani aniqlangandi. Shu bilan birga, Qashqadaryoda 177 mln so‘mlik gaz va “svet”dan noqonuniy foydalangan shaxslar ushlangani xabar qilingandi.
Shuningdek, Qashqadaryoda elektrdan noqonuniy foydalangan korxona davlatga 1 mlrd so‘mdan ziyod zarar yetkazgan. Bundan tashqari, Toshkent, Samarqand va Qashqadaryo viloyatlarida energiya resurslariga noqonuniy ulanish holatlari fosh etilgandi. Shuningdek:
- Buxoroda 1,2 mlrd so‘mlik elektrdan noqonuniy foydalanilgani aniqlandi.
- Qoraqalpog‘istonning uchta hududida 845 mln so‘mlik gazdan noqonuniy foydalanildi.
- Buxoro va Jizzaxda elektrdan noqonuniy foydalanganlar 360 mln so‘mdan ziyod zarar yetkazdi.
- Uchta viloyatda qariyb yarim mlrd so‘mlik gazdan noqonuniy foydalanildi.
2025-yil may oyida o‘tkazilgan tekshiruvlar natijasida iste’molchilar tomonidan energiya resurslaridan noqonuniy foydalanilgan 229 ta holat aniqlanib, tizimga 94 milliard 887 million so‘mlik zarar yetkazilgani ma’lum bo‘ldi.
Jumladan, noqonuniy foydalanishlar natijasida:
- 35,6 million kVt soat elektr energiyasi (taxminan 57,9 milliard so‘m) va
- 13,2 million metr kub tabiiy gaz (taxminan 36,9 milliard so‘m) talon-toroj qilingan.
Nazorat tadbirlari yakuniga ko‘ra, energiya resurslaridan foydalanish qoidalarini buzgan iste’molchilar bo‘yicha 448 ta ma’muriy ish rasmiylashtirildi. Belgilangan tartibda choralar ko‘rilib, tegishli hujjatlar huquqni muhofaza qiluvchi organlarga taqdim etildi.
Izoh (0)