Prezident Shavkat Mirziyoyev 23-iyun kuni Malayziya bosh vazirining o‘rinbosari, energetik o‘tish va suv resurslarini transformatsiya qilish vaziri Fadilloh bin Yusuf boshchiligidagi delegatsiyani qabul qildi. Bu haqda Prezident matbuot xizmati xabar berdi.
Malayziyaning nufuzli delegatsiyasi ikki tomonlama muzokaralar o‘tkazish hamda Samarqand shahridagi Birlashgan Millatlar Tashkilotining Davlat xizmati bo‘yicha forumida ishtirok etish uchun rasmiy tashrif bilan O‘zbekistonda bo‘lib turibdi.
Uchrashuv avvalida Fadilloh bin Yusuf davlat rahbariga bosh vazir Anvar Ibrohimning salomi va eng ezgu tilaklarini yetkazdi.
O‘zbekiston-Malayziya ko‘p qirrali munosabatlarini joriy yil fevral oyida Kuala-Lumpurga amalga oshirilgan oliy darajadagi tashrifda erishilgan kelishuvlar doirasida yanada kengaytirish masalalari ko‘rib chiqildi.
Turli darajalardagi aloqalar, tashriflar va almashinuvlar faollashgani katta mamnuniyat bilan qayd etildi. Joriy yil boshidan tovar ayirboshlash hajmi 25 foizga oshdi. Qo‘shma korxonalar soni va aviaqatnovlar ko‘paydi. Ertaga ikki mamlakat yetakchi kompaniyalari ishtirokida biznes forumi bo‘lib o‘tadi.
Iqtisodiy hamkorlikda mavjud salohiyatni ro‘yobga chiqarish hamda savdo, innovatsiyalar, “yashil” energetika, neft-gaz va kimyo, geologiya, suv resurslarini boshqarish, elektronika va yarimo‘tkazgichlar sanoati, sog‘liqni saqlash, kadrlar tayyorlash, ziyorat turizmini rivojlantirish va boshqa ustuvor yo‘nalishlarda kooperatsiya loyihalarini faol ilgari surish muhimligi qayd etildi.
Izoh (0)