Shavkat Mirziyoyev 20-iyundagi yig‘ilishda Respublikadagi barcha tuman hokimlari Shahrisabz, Yakkabog‘ va Ko‘kdala tumanlaridagi kabi yangi loyihalarni amalga oshirishi kerakligini aytdi.
-6zcqwDyd.avif)
Davlat rahbari 19-iyunda Qashqadaryoning turli obyektlarga tashrifdan olgan taassurotlari bilan bo‘lishdi. Xususan, uch yil oldin Chiroqchidan ajralib chiqqan Ko‘kdala tumani. O‘tgan davrda bu yerda 120 kilometr suv, 210 kilometr elektr tarmog‘i qurildi, 605 kilometr tuproq yo‘llar ta’mirlandi, 19 ta maktab, 22 ta bog‘cha, 5 ta oilaviy poliklinika ishga tushdi. Ishlab chiqarish korxonalari 3 karra oshib, 220 taga yetdi. Qisqa davrda “Miraki”ning o‘zida 180 million dollarlik 200 dan ortiq loyiha ishga tushdi, 2 ming ish o‘rni yaratildi. Yana 150 million dollarlik loyihalarda ishlar ketyapti. Yakkabog‘ tuman markazida 1 ming 400 xonadonli 54 ta ko‘p qavatli uylar, “Eko bozor”, zamonaviy savdo va ko‘ngilochar markazi barpo bo‘ldi.
“To‘g‘risi bu menga juda ma’qul bo‘ldi. Mana, tuman markazi qanday bo‘lishi kerak! Bunday loyihalarni har bir tuman, har bir mahallada qilsak, o‘sha hududga madaniyat kiradi, islohotlarimiz joylargacha yetib borganining yaqqol natijasi bo‘ladi”, dedi prezident.
Shahrisabz shahrida 10 million dollarlik ko‘p tarmoqli zamonaviy klinika ishga tushirildi. Har bir hududda kamida 1 tadan mana shunday xususiy klinika ochilishiga ko‘maklashish zarurligi ko‘rsatib o‘tildi. Prezident buning uchun davlat 140 million dollar resurs ajratishga tayyorligini aytdi.
“Qisqa qilib aytganda, Shahrisabz, Yakkabog‘ va Ko‘kdalada ishga tushgan yangi loyihalar “Islohotlar shtabi”ga tayyor andoza. Respublikadagi barcha tuman hokimlari Shahrisabz, Yakkabog‘ va Ko‘kdalani kelib ko‘rsin, o‘rgansin, o‘zida ham mana shunday yangi-yangi loyihalarni qilsin”, dedi Shavkat Mirziyoyev.
Davlat rahbari Qashqadaryoning yalpi hududiy mahsulotini kelgusi besh yilda bemalol 10 milliard dollardan oshirish mumkinligini aytdi. Shu munosabat bilan Qashqadaryoda viloyat “Islohotlar shtabi” tuzilishi belgilandi.
Shavkat Mirziyoyevning Qashqadaryoga tashrifi birinchi kuni
Shavkat Mirziyoyev Qashqadaryoga hududlar rivoji, islohotlar natijadorligi bilan tanishish maqsadida kelgandi. 19-iyundagi tashrifini Qarshi shahridagi “Alp texno servis” elektrotexnika korxonasi bilan tanishuvdan boshladi. Qarshi shahridan Shahrisabzga poyezdda bordi va u yerda ko‘p tarmoqli kardiologiya markazi faoliyati bilan tanishdi. Yakkabog‘ tumanida barpo etilgan “Yangi O‘zbekiston” massivini borib ko‘rdi. Shahrisabz tumani Hisor tog‘i yon bag‘ridagi sayyohlik salohiyati bilan tanishdi. “Miraki” xalqaro turizm markaziga tashrif buyurdi. “Hisorak”da 1,5 million dollarga qurilgan kichik GESni ko‘zdan kechirdi. Shahrisabz tumanidagi agroturizm majmuasini borib ko‘rdi.
Izoh (0)