Angliyaning “Liverpul” klubi Madridning “Real” jamoasida to‘p surayotgan braziliyalik hujumchi Vinisius Juniorni o‘z safiga qo‘shib olish niyatida. Bu haqda Ispaniyaning Defensa Central nashri xabar bermoqda.
Manbaga ko‘ra, “qizillar” 25 yoshli futbolchi uchun 100 million yevro asosiy to‘lov hamda 30 million yevro bonus sifatida taklif qilishi mumkin. Shu tariqa, transferning umumiy qiymati 130 million yevroga yetishi kutilmoqda. Bu esa “Liverpul” tarixidagi eng yirik xaridlardan biriga aylanadi.
Avvalroq OAVda “Real Madrid” Vinisius Juniorni sotishga tayyor ekani haqidagi xabarlar tarqalgan edi. Hozirda futbolchining “qaymoqranglilar” bilan shartnomasi 2027-yil yozigacha amal qiladi. Biroq uning jamoadagi kelajagi hanuz mavhumligicha qolmoqda.
Ma’lumot uchun, Vinisius 2024/25-yilgi mavsum “Real” safida 58 ta o‘yinda maydonga tushib, o‘z hisobiga 22 ta gol va 19 ta golli uzatma yozdirib qo‘ygan. Transfermarkt portali futbolchining qiymatini 170 million yevroga baholamoqda.
Izoh (0)