Mo‘g‘uliston poytaxti Ulan-Bator shahrida 23-iyun kuni Shavkat Mirziyoyevning davlat tashrifi arafasida O‘zbekiston—Mo‘g‘uliston biznes-forumi bo‘lib o‘tdi. Bu haqda “Daryo” muxbiri xabar bermoqda.
Tadbirda ikki mamlakatning vazirlik va idoralari, hududlar, tarmoq uyushmalari rahbarlari hamda 300 dan ortiq kompaniya vakillari ishtirok etdi. O‘zbekiston delegatsiyasiga bosh vazir o‘rinbosari Jamshid Xo‘jayev, Mo‘g‘uliston tomoniga esa mamlakat bosh vaziri o‘rinbosari Saynbuyangiyn Amarsayxan rahbarlik qildi.
Forum ishtirokchilariga murojaat qilar ekan, Jamshid Xo‘jayev so‘nggi yillarda O‘zbekistonda biznes muhiti va investitsiya jozibadorligini yaxshilash bo‘yicha amalga oshirilgan islohotlarga e’tibor qaratdi. Natijada mamlakat YIM ikki barobarga oshib, ilk bor 100 milliard dollardan oshdi, 2024-yilda iqtisodiy o‘sish sur’ati 6,5 foizni tashkil etdi. Mamlakatga 70 milliard dollardan ortiq to‘g‘ridan-to‘g‘ri xorijiy investitsiyalar jalb qilindi.
O‘zbekiston hukumatining xorijiy investorlarni to‘liq qo‘llab-quvvatlashga va qo‘shma loyihalarni muvaffaqiyatli amalga oshirish uchun barcha shart-sharoitlarni yaratishga tayyor ekanligi yana bir bor tasdiqlandi.
O‘zaro manfaatli hamkorlik uchun ustuvor yo‘nalishlar belgilandi. Jumladan, savdo sohasida meva-sabzavot mahsulotlari, o‘g‘itlar, qurilish materiallari, farmatsevtika, maishiy texnika, to‘qimachilik, poyabzal, go‘sht, charm, jun mahsulotlari eksporti, savdo uylari va ko‘rgazmalar tashkil etish kabi tashabbuslar ilgari surildi.
Ikkala davlat o‘rtasidagi sanoat kooperatsiyasi charm, jun va kashemirni qayta ishlash, elektr jihozlari, mashinalar va qurilish materiallari ishlab chiqarish bo‘yicha qo‘shma korxonalarni tashkil etish orqali rivojlanadi. Qishloq xo‘jaligi va chorvachilik yo‘nalishlarida issiqxonalar qurish, tomchilatib sug‘orish texnologiyalarini joriy etish, hosilni saqlash va qayta ishlash bo‘yicha loyihalar ilgari surildi. Foydali qazilma konlarini qidirish va o‘zlashtirish bo‘yicha qo‘shma loyihalar katta istiqbollarga ega ekani ta’kidlandi.
O‘z navbatida, Mo‘g‘uliston bosh vaziri o‘rinbosari Saynbuyangiyn Amarsayxan O‘zbekistonda yaratilgan qulay investitsiya muhitini yuqori baholab, Mo‘g‘uliston tadbirkorlarini o‘zbek hamkorlari bilan faol va dadil hamkorlik qilishga chaqirdi.
Forum yakunida jun, aralash matolar, to‘qimachilik va charm mahsulotlarini O‘zbekistonda ishlab chiqarishga oid qo‘shma loyihalarni amalga oshirish bo‘yicha ikki tomonlama hujjatlarni almashish marosimi bo‘lib o‘tdi.
Forum doirasida Made in Uzbekistan milliy mahsulotlari ko‘rgazmasi ochildi, unda o‘zbek ishlab chiqaruvchilarning mahsulotlari namoyish etildi. B2B va G2B uchrashuvlari o‘tkazildi. Tadbirkorlar amaliy hamkorlik yo‘nalishlarini muhokama qilib, keyingi hamkorlik uchun aniq qadamlarni belgilab oldi.
O‘zbekiston—Mo‘g‘uliston biznes-forumidan lavhalar
Shavkat Mirziyoyev Mo‘g‘uliston prezidenti Uxnaagiyn Xurelsuxning taklifiga binoan 24—25-iyun kunlari davlat tashrifi bilan ushbu mamlakatda bo‘ladi. Mo‘g‘uliston yetakchisi Shavkat Mirziyoyev taklifiga binoan 2024-yil 23—26-iyun kunlari davlat tashrifi bilan O‘zbekistonda bo‘lgandi.
Izoh (0)