Toshkentdagi barcha charter reyslar “Toshkent—Sharqiy” aeroportiga ko‘chiriladi. Bu haqda Uzbekistan Airways boshqaruvi raisi Shuhrat Xudoyqulov “O‘zbekiston 24” telekanalida bergan intervyusida ma’lum qildi.
Uning qayd etishicha, so‘nggi 7−8 yilda yillik yo‘lovchilar oqimi o‘rtacha 20 barobarga oshdi. Hozirda Toshkent xalqaro aeroportida kuniga 10 dan ortiq charter reyslar amalga oshiriladi. Ularning barchasi rekonstruksiya qilinayotgan aeroportga ko‘chiriladi.
Shavkat Mirziyoyev 18-iyun kuni “Toshkent—Sharqiy” aeroporti qurilishini ko‘zdan kechirgandi. Aeroport yuqori xalqaro standartlarga javob beradigan tez, xavfsiz va qulay qatnovlarni ta’minlash, shuningdek, poytaxtning asosiy xalqaro aeroportiga yuklamani yengillashtirishga mo‘ljallangan. 4 kilometr uzunlikdagi uchish-qo‘nish yo‘lagi yangilanib, eng og‘ir samolyotlarni ham qabul qilish quvvatiga ega bo‘ldi.
Hozirgi kunda yuqori martabali mehmonlar hamda biznes-aviatsiya uchun 2 ta terminal, perron va angarlar barpo etilmoqda. Aeroport noqulay ob-havo sharoitlarida ham uchish-qo‘nishni ta’minlovchi ICAO III-A toifasidagi ilg‘or radiotexnika va meteorologiya uskunalari bilan jihozlanadi. Bu tuman va ko‘rish nolga teng bo‘lgan sharoitda ham parvozlarni qabul qilish imkonini beradi.
Taqdim etilgan bosh rejaga ko‘ra, ushbu aeroportning umumiy maydoni 561 gektarni tashkil etadi. Yo‘lovchi terminali soatiga 100 kishigacha xizmat ko‘rsatadi. Aerodrom perronida bir vaqtning o‘zida 23 ta ikki palubali Boeing-747 samolyotlari sig‘ishi mumkin bo‘ladi. Yopiq angarlarda samolyotlar soz va xavfsiz saqlanishi uchun zamonaviy sharoitlar ta’minlanadi.
Shuhrat Xudoyqulovning bildirishicha, aeroport yaqin kunlarda foydalanishga topshiriladi.
Sobiq harbiy aerodrom negizida yangi aeroport qurilishi prezidentning 2017-yil 30-iyundagi qaroriga muvofiq amalga oshirilmoqda. Shavkat Mirziyoyev 2023-yilning iyul va 2024-yilning sentyabr oylarida ham “Toshkent—Sharqiy” aeroporti qurilishini ko‘zdan kechirgandi. Qurilish ishlarini moliyalashtirish, terminalning tashqi ko‘rinishi va delegatsiyalar uchun qulayliklarni qayta ko‘rib chiqish bo‘yicha topshiriqlar bergandi.
Izoh (0)