Angliyaning “Manchester Siti” klubi bosh murabbiyi Xosep Gvardiola yangi mavsum oldidan jamoa tarkibini qisqartirish niyatida ekanini ma’lum qildi.
Ispaniyalik mutaxassis “Al-Ayn”ga qarshi o‘yindan oldin o‘tkazilgan matbuot anjumanida zaxirada ko‘p futbolchini ushlab turishni istamasligini aytdi:
“Men hozirgi tarkibdagi futbolchilarni butun mavsum davomida saqlab qolishni istardim. Ular bilan bog‘liq hech qanday shikoyatim yo‘q — o‘zini tutishi, munosabati juda yaxshi. Ammo menga zaxirada olti-yetti futbolchi kerak emas. Ular o‘yin amaliyotisiz tushkunlikka tushadi. Men bunday holatni istamayman. Shu bois ba’zi futbolchilar jamoadan ketadi.” — dedi Gvardiola.
Ma’lumot uchun, ayni paytda “Manchester Siti” Klublar o‘rtasidagi Jahon chempionatida ishtirok etmoqda. Jamoa birinchi turda Marokashning “Vidad” klubiga qarshi bahs olib borib, 2:0 hisobida g‘alaba qozondi.
“Shaharliklar” ikkinchi tur uchrashuvini ertaga, 23-iyun tongida BAAning “Al-Ayn” jamoasiga qarshi o‘tkazadi. Bahs O‘zbekiston vaqti bilan soat 6:00 da boshlanishi rejalashtirilgan.
Izoh (0)