Mudofaa vazirligi tizimida tayinlovlar amalga oshirildi. Bu haqda vazirlik axborot xizmati xabar berdi.
Keltirilishicha, prezidentning tegishli farmoyishiga muvofiq, general-mayor Farhod Shermatov Ortiqovich O‘zbekiston harbiy xavfsizlik va mudofaa universiteti boshlig‘ining birinchi o‘rinbosari lavozimiga tayinlandi. General-mayor Shermatov Farhod Ortiqovich ushbu tayinlovga qadar Janubi-g‘arbiy maxsus harbiy okrug qo‘shinlari qo‘mondoni lavozimida faoliyat yuritgan.
Shuningdek, polkovnik Kadirjon Tursunov Abdipattayevich Janubi-g‘arbiy maxsus harbiy okrug qo‘shinlari qo‘mondoni lavozimiga tayinlandi. Polkovnik Tursunov Kadirjon Abdipattayevich ushbu tayinlovga qadar O‘zbekiston mudofaa vazirining jangovar tayyorgarlik bo‘yicha o‘rinbosari lavozimida faoliyat yuritgan.
Polkovnik Qahramonjon Zoidov Obidjonovich O‘zbekiston harbiy xavfsizlik va mudofaa universitetining Quruqlikdagi qo‘shinlar instituti boshlig‘i lavozimiga tayinlandi.
Polkovnik Abdulla Xamrayev O‘zbekiston harbiy xavfsizlik va mudofaa universitetining Harbiy aviatsiya instituti boshlig‘i lavozimiga tayinlandi.
Podpolkovnik Baxtiyor Rahimov Nematovich O‘zbekiston harbiy xavfsizlik va mudofaa universitetining Axborot-kommunikatsiya texnologiyalari va aloqa harbiy instituti boshlig‘i lavozimiga tayinlandi.
Tibbiy xizmat polkovnigi Ulug‘bek Rasulov Abdugafurovich O‘zbekiston harbiy xavfsizlik va mudofaa universitetining Harbiy tibbiyot instituti boshlig‘i lavozimiga tayinlandi.
29-iyul kuni prezident Shavkat Mirziyoyev harbiy taʼlim tizimini takomillashtirishga oid takliflar taqdimoti bilan tanishgan edi. Taklifga ko‘ra, Qurolli kuchlar akademiyasi isloh qilinib, uning negizida Harbiy xavfsizlik va mudofaa universiteti tashkil etilishi ko‘zda tutilmoqda.
Mudofaa vazirligining barcha harbiy taʼlim muassasalari – 5 ta institut, Serjantlar tayyorlash oliy maktabi hamda Aviatsiya va uchuvchisiz uchish apparatlari mutaxassislarini tayyorlash markazi institut maqomida mazkur universitet tarkibiga o‘tkaziladi.
Izoh (0)