Avstraliya hukumati 16 yoshdan kichik foydalanuvchilarga YouTube’da akkaunt ochish taqiqini joriy qilmoqda. Bu haqda Arab News xabar berdi.
Ta’kidlanishicha, kommunikatsiyalar vaziri Anika Uells 30-iyul kuni yosh chegarasini belgilashi kerak bo‘lgan ijtimoiy tarmoqlar ro‘yxatini e’lon qilgan. Unga ko‘ra, 10-dekabrdan boshlab barcha platformalarda yosh chegarasi o‘rnatilmasa, ularga 50 million Avstraliya dollargacha jarima solinadi.
Avstraliya parlamenti 2024-yil noyabrida Facebook, Instagram, Snapchat, TikTok va X kabi platformalarda 16 yoshgacha bo‘lgan bolalarning akkaunt ochishini taqiqlovchi qonunni qabul qilgan edi. Ammo bu ro‘yxatda shu paytgacha YouTube mavjud bo‘lmagan.
Uells YouTube’ga taqiq joriy etilishini izohlab, platformaning AQSHdagi egasi Alphabet Inc. Avstraliyani sudga berishidan qo‘rqmasligini bildirgan.
“Avstraliyalik bolalarning 40 foizi YouTube’dan zarar ko‘rgan. Biz bolalarimiz farovonligi uchun kurashda tahdidlardan qo‘rqmaymiz”, degan Uells.
Yangi qo‘llanilayotgan choralarga ko‘ra, endilikda bolalar YouTube videolarini tomosha qila oladi, ammo o‘zlarining nomidan hisob yaratishi taqiqlanadi. Bu holat yuzasidan platforma rasmiy bayonot bergan. Unda aytilishicha, “YouTube ijtimoiy tarmoq emas, balki bepul sifatli videolar kutubxonasi”. Kompaniya, shuningdek, keyingi qadamlarini ko‘rib chiqishini ma’lum qilgan.
Avstraliya bosh vaziri Entoni Albanese bolalarni ijtimoiy tarmoqlardan himoya qilish uchun xalqaro hamjamiyat bilan birga harakat qilishini bildirgan.
“Boshqa davlat rahbarlari bilan muloqotlarimda shunga guvoh bo‘ldimki, ular ham bolalarga ijtimoiy tarmoqlar salbiy ta’sir etishidan xavotirda. Bu faqat Avstraliyaga xos emas, balki global muammo,” degan Albanese.
Uells ijtimoiy tarmoqlarni yoshni aniqlovchi alternativ usullardan foydalanishga chaqirib, shunday dedi:
“Yoshni aniqlash uchun boshqa alternativ usullardan foydalaning. Masalan, platformalar foydalanuvchilar haqida aniq-tiniq ma’lumotlarga ega, masalan, ularning kimligi, qachon akkaunt ochgani va hokazo”.
Onlayn o‘yinlar, xabar almashish, ta’lim va sog‘liqni saqlash ilovalari esa yosh chegarasidan mustasno qilinishi qo‘shimcha qilingan. Hukumatga ko‘ra, bu cheklov yoshlarning zararli odatlar, ijtimoiy izolyatsiya, uyqu buzilishi, ruhiy va jismoniy sog‘liq muammolari hamda noo‘rin kontentdan himoya qilishga qaratilgan.
Izoh (0)