G‘azo sektori bo‘ylab Isroil hujumlari oqibatida 19-iyun kuni 92 kishi halok bo‘ldi. Bu haqda Al Jazeera xabar berdi.
19-iyun tongidan beri halok bo‘lganlarning 64 nafari G‘azo shahri va shimolida, yana 16 nafari G‘azoning shimoli va janubini ajratib turuvchi Netzarim yo‘lagi yaqinida yordam kutib turgan edi.
Och falastinliklar har kuni AQSH va Isroil tomonidan qo‘llab-quvvatlanadigan G‘azo gumanitar jamg‘armasidan yordam olish uchun hududga to‘planadi. Birlashgan Millatlar Tashkiloti yordamni “qurolga aylantirgani” uchun G‘GJni qoralagan. Yordam ko‘rsatish obyektida Isroil hujumiga guvoh bo‘lgan Bassam Abu Shaarning aytishicha, odamlar oziq-ovqat olish umidida tunda to‘plangan edi.
“Tungi soat 1 larda bizga qarata o‘q uza boshlashdi. Otishma tanklar, samolyotlar va kvadrokopter bombalaridan kuchayib ketdi. Biz ularga yordam bera olmadik. Hatto o‘zimiz ham qochib qutula olmadik”, dedi u.
So‘nggi haftalarda Isroilning oziq-ovqat yordami olishga urinayotgan falastinliklarga hujumlari ko‘payib, o‘nlab odamlar halok bo‘lgan. Al Jazeera telekanali muxbiri Tareq Abu Azzumning aytishicha, yordam ko‘rsatish joylarida odamlarga hujum qilish “kundalik odat”ga aylanib bormoqda.
Isroil harbiylarining ma’lum qilishicha, kuchlar gumonlanuvchilarga ularga yaqinlashishiga yo‘l qo‘ymaslik uchun ogohlantiruvchi o‘q uzgan. Bundan tashqari, Isroil droni Al-Shati qochqinlar lagerida falastinliklar elektr qurilmalarini zaryadlayotgan chodirga hujum qilib, 13 kishini o‘ldirgan. Shuningdek, Isroil samolyoti G‘azo shimolidagi Jabaliya shahrida intensiv havo hujumlari uyushtirib, bir nechta uylarni bombardimon qilgan.
O‘tgan kun davomida qamaldagi shifoxonalarga 69 jasad olib kelingani va 221 yarador yotqizilgani ochiqlangan. G‘azo Sog‘liqni saqlash vazirligi ma’lumotlariga ko‘ra, 2023-yil oktyabr oyida urush boshlanganidan beri kamida 55 706 kishi halok bo‘lgan va 130 101 kishi yaralangan.
Izoh (0)