G‘azo yordam markazida 18-iyun kuni Isroilning hujumi oqibatida 11 kishi halok bo‘ldi. Bu haqda BBC xabar berdi.
HAMAS tomonidan boshqariladigan fuqarolik mudofaasi agentligi vakilining aytishicha, Isroil kuchlari Saloh ad-Din yo‘lida o‘ta zarur oziq-ovqat zaxiralari uchun navbatda turgan minglab odamlarga o‘t ochgan va bir nechta snaryadlar otgan.
Nuseyrat hududida harakatlanayotgan Isroil qo‘shinlari tunda mahalliy aholi ularga potensial xavf tug‘diradigan tarzda yaqinlashganidan so‘ng ogohlantiruvchi o‘q uzgan, biroq ular biror kim jarohat olganini bilmagan.
G‘azo shimoli va janubida Isroilning 3 ta havo hujumi oqibatida yana 19 kishi halok bo‘ldi, deya xabar bermoqda fuqaro mudofaasi agentligi. Ular orasida G‘azoning Zaytun hududidagi uyga zarba berilganda halok bo‘lgan 8 kishi ham borligi aytilgan. Isroil bu hujumni “HAMASning harbiy salohiyatini yo‘q qilishga uringani” bilan izohlamoqda.
G‘azoning HAMAS tomonidan boshqariladigan sog‘liqni saqlash vazirligi 18-iyun kuni so‘nggi 24 soat ichida kamida 140 kishi halok bo‘lganini bildirgan. Vazirlik 17-iyun kuni Xon Yunus shahrida 51 kishi yordam kutish chog‘ida halok bo‘lganini ma’lum qilgandi. BMT esa qurbonlar soni 60 dan oshganiga ishora qilgan.
Sog‘liqni saqlash vazirligi ma’lumotlariga ko‘ra, Isroil va AQSH tomonidan qo‘llab-quvvatlanadigan G‘azo gumanitar jamg‘armasi 26-may kuni ish boshlaganidan beri bu yerda yordam olishga uringan deyarli 400 kishi halok bo‘lgan.
Izoh (0)