Nogironligi bo‘lganlar uchun transport moslashuvi xarajatlari davlat hisobidan qoplanadi

Avtotransport vositalarini nogironligi bo‘lgan shaxslar ehtiyojlariga moslashtirish xarajatlari qoplab beriladi. Bu haqda Adliya vazirligi xabar berdi. 

Ma’lum qilinishicha, hukumat qarori bilan “Avtotransport vositalarini nogironligi bo‘lgan shaxslar ehtiyojlariga moslashtirish xarajatlarini qoplash bo‘yicha davlat xizmatini ko‘rsatish”ning ma’muriy reglamenti tasdiqlandi.

Reglamentga ko‘ra, avtotransport vositalarini nogironligi bo‘lgan shaxslar ehtiyojlariga moslashtirish xarajatlarining 50 foizi, biroq BHMning 30 baravarigacha bo‘lgan qismi qoplab beriladi. 

Bunda xarajatlar 2024-yil 1-oktyabrgacha shahar, shahar atrofi, shaharlararo avtobusda yo‘lovchi tashish yo‘nalishlarini biriktirish bo‘yicha tenderda g‘olib bo‘lib, ushbu yo‘nalishlarda xizmat ko‘rsatgan tadbirkorlarning har bir avtobusi uchun qoplanadi.

Shuningdek, 2024-yil 1-noyabrdan I guruh nogironligi bo‘lgan shaxslarning o‘z nomiga rasmiylashtirilgan va shaxsiy foydalanuvida bo‘lgan 1 ta avtotransport vositasi uchun amalga oshiriladi. Avtotransport vositalarini quyidagilar bilan jihozlash uni nogironligi bo‘lgan shaxslar ehtiyojlariga moslashtirish deb e’tirof etiladi:

tadbirkorlarning avtobuslari uchun:

• yig‘ma pandus (1 dona);
• audio va vizual axborot beruvchi monitor (1 dona);
• axborot beruvchi kolonka (ko‘pi bilan 3 ta);
• ma’lumotlarni uzatuvchi mikrofon (1 dona);
• aloqa tugmasi;
• bekatlar haqida axborot olish imkonini beruvchi ma’lumotlar taxtasi bilan jihozlash (1 dona);

I guruh nogironligi bo‘lgan shaxslarning shaxsiy avtotransport vositalari uchun:

• gaz va tormoz pedalini qo‘l boshqaruviga o‘tkazish;
• mexanik uzatish qutisini avtomat uzatish qutisi qilib qayta jihozlash xarajatlari.

Ariza beruvchilar avtotransport vositasi talablarga moslashtirilgan vaqtdan e’tiboran 90 kun ichida “Inson” markazlariga yoki “Yagona” milliy ijtimoiy himoya" axborot tizimi yoki YIDXP (my.gov.uz) orqali murojaat qilishi lozim.

O‘zbekistonda 1-iyun holatiga ko‘ra, nafaqa oluvchilar soni 719 219 nafarga yetdi. 

Keltirilgan statistik ma’lumotlarga ko‘ra:

• 18 yoshgacha bo‘lgan nogironligi bor bolalar nafaqasi – 171 585 nafar (-242 nafar);
• Nogironlik nafaqasi – 316 941 nafar (+256 nafar);
• Parvarishlash nafaqasi – 74 453 nafar (-365 nafar);
• Yoshga doir nafaqa – 88 950 nafar (+840 nafar);
• Boquvchisini yo‘qotganlik nafaqasi – 57 989 nafar (+375 nafar);
• Yolg‘iz keksa va nogiron shaxslarga moddiy yordam – 7 743 nafar (-25 nafar).