Shavkat Mirziyoyev 11-iyun kuni Xorijiy investorlar kengashining uchinchi majlisi arafasida Yevropa tiklanish va taraqqiyot banki prezidenti Odil Reno-Basso boshchiligidagi delegatsiyani qabul qildi.
Prezident matbuot xizmatining xabar qilishicha, O‘zbekiston bilan ushbu nufuzli xalqaro moliyaviy institut o‘rtasidagi strategik hamkorlikni yanada kengaytirish masalalari ko‘rib chiqildi.
Qo‘shma loyihalar portfeli kengayib borayotgani qayd etildi. YTTBning O‘zbekistonga investitsiyalari 5,5 milliard yevrodan oshdi. 2025-yilda yana 1,1 milliard yevro jalb qilish rejalashtirilgan bo‘lib, uning katta qismi xususiy sektorni qo‘llab-quvvatlashga yo‘naltiriladi.
Sheriklik strategiyasi samarali amalga oshirilmoqda. YTTBning faol ko‘magi bilan bank sohasini transformatsiya qilinmoqda.
Davlat rahbari hamkorlik natijadorligini oshirish muhimligini ta’kidlab, uning asosiy ustuvor yo‘nalishlarini ko‘rsatib o‘tdi. Jumladan:
- suv ta’minoti tizimini texnologik jihatdan modernizatsiya qilish,
- energiya samaradorligini oshirish dasturini ilgari surish,
- ipoteka bozorini,
- erkin iqtisodiy zonalar infratuzilmasini rivojlantirish,
- kichik va o‘rta biznes imkoniyatlarini kengaytirish,
- ayollar tadbirkorligini qo‘llab-quvvatlash kabi yo‘nalishlar.
Ta’lim va tibbiyot sohalarida davlat-xususiy sheriklik loyihalarini ilgari surish, sun’iy intellektni joriy qilish va raqamli transformatsiyaga qaratilgan startaplarni qo‘llab-quvvatlashga alohida e’tibor qaratildi.
Xorijiy investorlar kengashining bo‘lajak uchinchi majlisi kun tartibi yuzasidan ham fikr almashildi.
Xorijiy investorlar kengashi yalpi majlisi uchinchi bor o‘tkazilmoqda. Birinchi yalpi majlis 2022-yilda bo‘lib o‘tgandi. Xorijiy investorlar kengashi prezidentining 2019-yil 13-noyabrdagi qaroriga muvofiq tashkil etilgan bo‘lib, uning asosiy vazifasi ilg‘or jahon tajribasi va amaliyotlariga tayangan holda O‘zbekiston hukumatiga mamlakatni investitsiyaviy, sanoat-texnologik va innovatsion rivojlantirishning eng muhim yo‘nalishlari bo‘yicha maslahatlar berishdan iborat.
Izoh (0)