Shavkat Mirziyoyev yangi qurilish loyihalarida tadbirkorlar elektr va gaz taʼminotiga ulanishi uchun texnik shartlar olish tizimini raqamlashtirish vazifasini qo‘ydi. Bu haqda prezident matbuot kotibi xabar berdi.
Bunda tarmoqqa ulanish nuqtasini inson omilisiz avtomatlashgan tarzda tanlash tizimi joriy qilinadi.
Bu yilgi Investitsiya dasturida 1 ming 896 ta loyihaga 20,5 trillion so‘m ajratildi. Lekin yilning yarmi o‘tgan bo‘lsa-da, 824 milliard so‘mlik 88 ta loyihada qurilish ishlari boshlanmagani ko‘rsatib o‘tildi va mutasaddilarga oqsoqlikni bartaraf etish yuzasidan topshiriq berildi.
Ayniqsa, 147 ta shifoxonani tibbiy jihozlar bilan taʼminlash, 80 ta poliklinika va 67 ta shifoxonada, 618 ta maktab va 176 ta bog‘chada qurilish ishlarini belgilangan muddatda yakuniga yetkazish shartligi haqida masʼullar qatʼiy ogohlantirildi.
Yil yakuniga qadar 2 trillion so‘mlik ishlarni bajarib, 570 ming gektarda suv taʼminotini yaxshilash va beton qoplamali kanallar ulushini 39 foizga yetkazish, 13 ming kilometr yo‘l, 195 ta ko‘prikni foydalanishga topshirish zarurligi qayd etildi.
2024-yilda 2 ming 152 ta ko‘p qavatli uy-joy barpo qilib, 100 mingdan ziyod xonadonni foydalanishga topshirish reja qilingan. Buning uchun 9 mingta xonadonli 195 ta uy-joy qurilishini tezroq boshlash zarurligi ko‘rsatib o‘tildi.
Ichimlik suvi infratuzilmasini yaxshilashga ajratilayotgan mablag‘larning samarasini aholimiz kundalik hayotida his qilishi shartligi taʼkidlandi. Jumladan, hududlarda 2 ming kilometr tarmoq, 99 ta suv inshooti va 1 ta oqova suv nasos stansiyasini ishga tushirish rejalashtirilgan.
Avvalroq Qurilish va uy-joy kommunal xo‘jaligi vaziri Botir Zokirov sog‘ligi tufayli lavozimidan ozod etilgani, vazirning birinchi o‘rinbosari Sherzod Hidoyatov vazir vazifasini bajaruvchi etib tayinlangani to‘g‘risida xabar berilgandi.
Izoh (0)