Samarqand shahrining Registon maydonida joylashgan Tillakori madrasasi restavratsiya qilinadi, shuningdek, “Imom Moturidiy” yodgorlik majmuasida rekonstruksiya-restavratsiya qilish, qo‘shimcha binolar qurish hamda hududni obodonlashtirish ishlari boshlanadi. Bu haqda Madaniy meros agentligi xabar bermoqda.
Ma’lum qilinishicha, 19—21-may kunlari Toshkent shahrida agentlik huzuridagi Ilmiy-ekspert kengashning yig‘ilishi o‘tkazilgan. Unda 120 ga yaqin loyiha ko‘rib chiqilgan.
Ilmiy-ekspert kengashining qaroriga ko‘ra, Samarqand shahar, Registon maydonida joylashgan Tillakori madrasasini restavratsiya va tiklashga yodgorlikning bezaklariga ziyon yetkazmaslik sharti bilan ruxsat berilgan. Shuningdek, Samarqand viloyatida joylashgan “So‘fi Olloyor” masjidida ta’mirlash-tiklash, Shahrisabz shahar tarixiy markazida joylashgan “Qal’a devori”, Surxondaryo viloyatidagi “Tuz g‘ori” madaniy meros obyektini mukammal ta’mirlash, Qashqadaryo viloyatidagi “Soqi Mavlon ota” maqbarasini tarixiy va tabiiy landshaft ko‘rinishini saqlagan holda kompleks ziyoratgohga aylantirish, “Imom Moturidiy” yodgorlik majmuasida rekonstruksiya-restavratsiya qilish, qo‘shimcha binolar qurish hamda hududni obodonlashtirish kabi takliflar ma’qullangan.
Bundan tashqari Jizzax viloyati, Baxmal tumanidagi “Toshbuloq” hamda “To‘g‘onbuloq” arxeologik yodgorliklarini moddiy madaniy merosning ko‘chmas mulk obyektlari milliy ro‘yxatiga kiritilishi tasdiqlangan.
Yig‘ilish davomida Namangan viloyatidagi “G‘urumsaroy” (“Xolmatboy”) masjidi hududida yangi masjid barpo etish, Andijon viloyatidagi “Hotamxon to‘ra” masjidi arxitektura yodgorligida mavjud xonaqo qismida qo‘shimcha bino qurish kabi loyihalar rad etilgan.
“Umumiy hisobda Buxoro, Toshkent va Samarqand shaharlari, Buxoro, Namangan, Sirdaryo va Xorazm viloyatlari bo‘yicha 11 ta loyiha tarixiy yodgorliklarning tashqi ko‘rinishiga salbiy ta’sir ko‘rsatishi mumkinligi, Kengash tomonidan berilgan tavsiyalar to‘liq bajarilmagani bois tasdiqdan o‘tmadi”, deyilgan xabarda.
Mart oyida Samarqandda Amir Temur oila a’zolari yashagan majmua 415 mln so‘mga restavratsiya qilinayotgani xabar berilgandi.
Aprel oyida prezident raisligida o‘tkazilgan videoselektor yig‘ilishida 2025-yilda madaniy meros obyektlari restavratsiyasiga kamida 4 million dollar grant jalb qilinishi ma`lum qilingandi.
Qashqadaryo viloyatidagi XV asrga oid “Langar ota” masjidi AQSH granti ko‘magida restavratsiya qilindi. Buning uchun AQSH Elchilari madaniy meros muhofazasi jamg‘armasi (AFCP)dan 250 ming AQSH dollari sarflandi.
Izoh (0)