Toshkent viloyatining Bo‘stonliq tumanida ziyoratgoh joylashgan qishloq chiqindixonaga aylanayotgani aytildi. Madaniy meros agentligi holat yuzasidan maʼlumot berdi.
Keltirilishicha, Toshkent viloyatining Bo‘stonliq tumanida joylashgan Shayx Umar Vali Bog‘istoniy ziyoratgohi Vazirlar Mahkamasining 2019-yil 4-oktyabrdagi “Moddiy madaniy merosning ko‘chmas mulk obyektlari milliy ro‘yxatini tasdiqlash to‘g‘risida”gi 846-sonli qarori bilan muhofazaga olingan.
Ziyoratgoh joylashgan hududda hozirgi vaqtda obodonlashtirish ishlari amalga oshirilmoqda. Tashrif buyuruvchilar uchun chiqindilar tashlash uchun maxsus qutilar o‘rnatilgan hamda biriktirilgan xodimlar tomonidan muntazam ravishda nazorat olib borilmoqda.
Viloyat boshqarmasi xodimlari tomonidan qadimiy obida ko‘zdan kechirilganida mehmonlar uchun oshxona, tahoratxona va yuvinish xonalari doimiy ozoda saqlab kelinayotgani maʼlum bo‘ldi.
Maʼlumot uchun, Bo‘stonliq tumanining “Bog‘iston” mahallasida joylashgan Shayx Umar Vali Bog‘istoniy yodgorligi VII-XV asrlarga oid ziyoratgoh hisoblanadi.
Avvalroq ijtimoiy tarmoqlarda Samarqand viloyatida joylashgan Xon Said Imom majmuasi ta’mirtalab holatga kelib qolgani haqida xabarlar tarqalgandi. Madaniy meros agentligi Samarqand viloyati boshqarmasi tomonidan holat atroflicha o‘rganib chiqilgan.
Unga ko‘ra, Madaniy meros agentligining 2024-yil 6-maydagi “2024-yilda restavratsiya va ta’mirlash-tiklash ishlari amalga oshiriladigan madaniy meros obyektlari va davlat muzeylarining manzilli ro‘yxati” tasdiqlangan bo‘lib, unda Xon Said Imom majmuasini restavratsiya va ta’mirlash-tiklash uchun 906,1 million so‘m mablag‘ ajratilgan.
Izoh (0)