Qashqadaryo viloyatidagi XV asrga oid “Langar ota” masjidi AQSH granti ko‘magida restavratsiya qilindi. Bu haqda Madaniy meros agentligi xabar berdi.
Unga ko‘ra, 4-iyun kuni Qashqadaryo viloyatining Qamashi tumanida joylashgan XV asrga oid “Langar ota” masjidining qayta tiklashdan keyingi ilk ochilish marosimi bo‘lib o‘tdi. Unda Madaniy meros agentligi direktori Bahodir Abdukarimov, AQSHning O‘zbekistondagi favqulodda va muxtor elchisi Jonatan Henik, viloyatning qator mutasaddi rahbarlari, ommaviy axborot vositalari va mahalla faollari ishtirok etishdi.
Mamlakatning madaniyati va e’tiqodi sarchashmalariga mansub yodgorliklaridan biri hisoblangan tarixiy “Langar ota” masjidi AQSH Elchilari madaniy meros muhofazasi jamg‘armasi (AFCP) tomonidan ajratilgan 250 ming AQSH dollarga teng ta’mirlash loyihasi natijasida qayta tiklandi va foydalanishga topshirildi.
“Madaniy meros obyektlarini qayta tiklash va asrab-avaylash borasida AQSH hukumati va elchi janoblari bilan hamkorlikda qator xayrli ishlarni amalga oshirib kelmoqdamiz. Bundan tashqari, bir necha yillardan beri usta restavratorlarning bilim va ko‘nikmalarini oshirish bo‘yicha hamkorlikda qator amaliy mahorat darslari ham tashkil etildi. Ikkala mamlakat o‘rtasidagi madaniy merosni himoya qilish yo‘nalishidagi hamkorlik munosabatlarini kelgusida ham yanada mustahkamlagan holda rivojlantirib boramiz”, deya ta’kidladi Madaniy meros agentligi direktori Bahodir Abdukarimov o‘z nutqida.
Qayd etilishicha, 2023-yilning kuz oylarida boshlangan restavratsiya loyihasi majmuaning koshinlarini asliday yangilash va masjidning nurab qolgan tom qismini o‘zgartirish ishlarini o‘z ichiga oldi. Shuningdek, amerikalik diplomat o‘z bayonotida O‘zbekistonning ajoyib va betakror madaniy merosini asrab-avaylashga o‘z hissasini qo‘shish imkoniyatiga ega bo‘lganidan mamnun ekanini qayd etdi.
Ma’lumot uchun, AQSH Elchilari madaniy meros muhofazasi jamg‘armasi 2001-yilda AQSH Kongressi tomonidan ta’sis etilgan. AQSH davlat departamenti tomonidan boshqariladigan AFCP jamg‘armasi butun dunyo bo‘ylab tarixiy obyektlar, qo‘lyozmalar va madaniy an’analarni saqlashni qo‘llab-quvvatlab keladi. O‘zbekistonda AQSH hukumati hozirgacha umumiy qiymati 2,5 million AQSH dollarga teng bo‘lgan 15 ta loyihani moliyalashtirgan.
2025-yilning mart oyida Samarqand viloyatidagi XIX-XX asrlarga oid 3 ta tarixiy masjid binolari buzib tashlangani aniqlangandi. Prokuratura organlari tomonidan Madaniy meros agentligi bilan hamkorlikda o‘tkazilgan nazorat tadbirlari davomida 3 ta tarixiy masjid binolari buzib tashlanganidan tashqari, yana bir masjid tegishli ruxsatsiz ta’mirlangani oqibatida yodgorliklarga jami 46,8 milliard so‘mlik zarar yetkazilgan.
Izoh (0)