Samarqand viloyatidagi “Registon” ansambliga 2022-yilda 1 027 951 nafar mahalliy va xorijiy turistlar tashrif buyurdi. Bu haqda Turizm va madaniy meros vazirligi xabar qildi.
Qayd etilishicha, 2022-yilda “Registon” ansamblini takomillashtirish borasida qator ishlar amalga oshirilgan. Xususan, yil davomida olib borilgan restavratsiya va konservatsiya ishlarida topilgan noyob tarixiy ashyolar “Tillakori” madrasasidagi “Samarqand tarixiy suratlarda” nomli ekspozitsiyadan o‘rin olgan.
Shuningdek, 2022-yil 27-avgust kuni “Sherdor” madrasasidagi “Suratlarda aks etgan tarix” ekspozitsiyasidan o‘rin olgan “Mudarris va talabalar” kompozitsiyasidagi haykallar mumdan yasalgan realistik haykallar bilan almashtirilgan.
O‘zbekiston Respublikasi Fanlar akademiyasi Mirzo Ulug‘bek nomidagi Astronomiya instituti direktori, akademik Shuhrat Egamberdiyev tomonidan vaqtinchalik o‘rnatilgan quyosh soati joriy yilning yanvar oyida temir materialdan yasalgan soat bilan almashtirilib, maxsus marmar ustunga o‘rnatilgan.
“Ulug‘bek” madrasasi shimoliy ko‘cha fasadlarining 75,0 metr kvadrat qismi, “Sherdor” madrasasi janubiy ko‘cha fasadlarining 60,0 metr kvadrat qismi, “Sherdor” madrasasining ichki hovli qismidagi timpan va pannolarning 60 metr kvadrat qismi, “Tillakori” madrasasining ichki hovli qismidagi timpan va pannolarning 25 metr kvadrat qismi restavratsiya qilingan.
Ma'lumot uchun, joriy yilning 1–8-yanvar kunlari “Registon”ga jami 17 009 nafar turist kelgan. Shulardan 11 085 nafari mahalliy (2 645 nafari bolalar) va 2 979 nafari xorijiy (300 nafari bolalar) turistlar hisoblanadi.
Izoh (0)