AOKAda o‘tkazilgan brifingda Madaniy meros agentligi axborot xizmati rahbari Mohinur Imomova Samarqand viloyatidagi madaniy meros obyektlarini restavratsiya, konservatsiya qilish ishlari haqida ma’lumot berdi.
Qayd etilishicha, mamlakatda hozirgi kunga qadar 8 ming 210 ta moddiy madaniy merosning ko‘chmas mulk obyekti davlat muhofazasiga olingan bo‘lib, shundan 4 ming 788 tasi arxeologiya, 2 ming 265 tasi arxitektura obyektlari, 625 tasi monumental san’at asarlari, 530 tasi diqqatga sazovor joylar hisoblanadi.
2022-yil davomida Samarqandda 14 ta obyektda restavratsiya va konservatsiya ishlari olib borilgan. Unga jami 28,7 milliard so‘m mablag‘ ajratilgan. Samarqand shahridagi “Samarqand-madaniyatlar chorrahasi” obyekti hududida joylashgan Registon ansambli, Shohi Zinda va Bibixonim majmualari, Amir Temur maqbarasi, Ulug‘bek rasadxonasi, Oq Saroy, Xo‘ja Doniyor maqbarasi, Ruhobod majmuasi, Ashratxona maqbarasi, Chorsu savdo gumbazi va Qo‘shhovuz masjidlarini ta’mirlash-tiklash ishlarini olib borilgan.
Joriy yilda respublika miqyosida 64 ta moddiy madaniy meros obyektida restavratsiya va konservatsiya ishlari olib borilgan.
So‘nggi uch yilda 250 dan ortiq madaniy meros obyektlari restavratsiya va konservatsiya qilingan. Mazkur obyektlarga davlat budjetidan 339 milliard so‘m mablag‘ sarflangan. Bugungi kunda respublikada 400 dan ortiq usta-restavratorlar bor.
Izoh (0)