Go‘zallik tanlovi g‘olibasi va mashhur inflyuenser Nguyen Thuk Thuy Tyen iste’molchilarga noto‘g‘ri ma’lumot berganlikda ayblanib, Vyetnam hukumati tomonidan hibsga olindi. Bu haqda BBC nashri xabar berdi.
U o‘simlik tolalariga boy, deb reklama qilgan chaynaladigan konfet ko‘rinishidagi biologik faol qo‘shimcha haqidagi xabarlar soxta bo‘lib chiqdi.
Nguyen Thuk Thuy Tyen o‘zining ijtimoiy tarmoqlardagi sahifalarida tarkibida o‘simlik tolalari mavjud, deb aytilgan pastilka (tabletka)larni faol reklama qilib kelgan. Kera Supergreens nomli BFQ Fam Kuang Lin va Xang Zu Muk kabi inflyuenserlar tomonidan ham targ‘ib qilgan. Tergovda ma’lum bo‘lishicha, mazkur mahsulot Nguyen va uning ikki sherigi asos solgan kompaniya mahsulotlaridan biridir.
Ular har bir dona preparat bir nechta sabzavotlar iste’moliga teng miqdorda o‘simlik tolasini o‘z ichiga olishini da’vo qilishgan. O‘tkazilgan laboratoriya tahlillari bunday da’volarning haqiqatdan yiroq ekani isbotlangach, jamoatchilik orasida norozilik yuzaga keldi.
Fuqarolardan biri mahsulotni laboratoriya tahliliga yuborgach, har bir pastilka aslida atigi 16 mg tolani o‘z ichiga olgani, reklamada esa 200 mg deb ko‘rsatilgani ma’lum bo‘ldi. Ularni ishlab chiqarishda sifatsiz ingrediyentlar qo‘llangani ham aniqlandi.
Bundan tashqari, mahsulot qadoqlarida tolalar miqdori haqida ma’lumot bo‘lmagani hamda tarkibida diareyaga sabab bo‘ladigan sorbit moddasi juda ko‘p bo‘lsa-da, bu haqida hech qanday eslatma yo‘qligi qayd etilgan.
Mart oyida uchala inflyuenser jarimaga tortilib, jamoatchilikdan kechirim so‘rashgan. Mojaro yuzaga kelishidan oldin ushbu preparatlarning 100 mingdan ortiq qutisi sotilgan.
Ma’lumot uchun, Nguyen Thuk Thuy Tyen 2021-yilda Bangkokda bo‘lib o‘tgan Miss Grand International go‘zallik tanlovida g‘alaba qozonganidan so‘ng, Vyetnamda mashhurlikka erishgan, ko‘plab mahalliy brendlar uni reklamalarga jalb qilgan. Model bir nechta realiti-shoularda ham ishtirok etgan. Shuningdek, Vyetnam bosh vaziri va mahalliy hukumat tomonidan bir necha marta taqdirlangan.
Izoh (0)