O‘zbekiston bo‘ylab 1-sentabrdan boshlab sayohat qilganlarga xarajatlarining bir qismi qaytarib beriladi

Prezidentning 2022-yil 30-apreldagi “Ichki turizm xizmatlarini diversifikatsiya qilishga oid qo‘shimcha chora-tadbirlar to‘g‘risida”gi qaroriga muvofiq Turizm va madaniy meros vazirligi hamda Soliq qo‘mitasi hamkorligida keshbek tizimi taqdim etiladi.

Mazkur tizimga ko‘ra, 2022-yil 1-sentabrdan boshlab “O‘zbekiston bo‘ylab sayohat qil!” dasturi doirasida “Sayohat qil va keshbek ishla” shiori asosida respublika hududlari bo‘ylab ichki sayohatlarni amalga oshirgan O‘zbekiston fuqarolariga xarajatlarining bir qismi qaytarib beriladi.

Buning uchun:

• Soliq.uz mobil ilovasi yuklab olinadi;
• mobil ilova xizmatidan foydalanish uchun FaceID orqali fuqaro shaxsi tizimda tasdiqlanadi;
• sayohat yo‘nalishi va boshlanish sanasi tanlanadi;
• keshbeklarni yig‘ish uchun fiskal cheklarni skanerlash orqali avia, temiryo‘l yoki avtobus biletlari ilovaga kiritiladi;
• sayohatdan so‘ng “Sayohatni tugatish” tugmasini bosib, yig‘ilgan keshbek summalari shaxsiy mahalliy bank plastik kartasiga o‘tkaziladi.

Keshbek tizimi Davlat soliq qo‘mitasining maxsus mobil ilovasi (Soliq.uz) bilan integratsiya qilingan bo‘lib, xarajatlar haqqoniyligi mobil ilova yordamida tekshirilib, xarid chekining matritsali shtrix kodini (QR-kod) hamda mahalliy turistlarning doimiy yashash joylarini ko‘rsatish orqali sayohatlar ro‘yxatdan o‘tkaziladi.

Sayohat xarajatlarini qaytarish sayohat qilish davomida bir vaqtning o‘zida quyidagilar nazarda tutilganda amalga oshiriladi:

• avia, temiryo‘l va avtobusdan foydalanish;
• joylashtirish vositalari xizmatlaridan foydalanish;
• madaniyat tashkilotlariga tashrif buyurish.

Sayohat xarajatlarini qaytarish har bir turistga quyidagi miqdorlarda amalga oshiriladi:

• aviaqatnov orqali borib-kelish chiptasi narxining 15 foizi, lekin 150 ming so‘mdan oshmagan miqdorda;
• temiryo‘lda yoki avtobusda borib-kelish chiptasi narxining 15 foizi, lekin 80 ming so‘mdan oshmagan miqdorda;
• joylashtirish vositasida tunab qolish xarajatining 15 foizi, lekin 80 ming so‘mdan oshmagan miqdorda; teatr, muzey, sirk va badiiy galereyalarga har bir tashrif chiptasi narxining 50 foizi, lekin 20 ming so‘mdan oshmagan miqdorda.

Sayohat xarajatlari faqatgina platforma orqali amalga oshirilgan ichki sayohatlar uchun uning yakuni bilan mahalliy turistlarning bank kartalariga qaytariladi.

Mavzuga doir: O‘zbekistondagi ziyoratgohlar ro‘yxati yagona milliy turistik axborot portaliga joylashtirildi