Ўзбекистонда 2025 йил 1 июндан бошлаб туризм соҳасига оид барча давлат электрон тизим платформалари Миллий туризм ягона платформаси доирасида ишлаб чиқилади.
“2025—2026 йилларда сайёҳлар оқимини кескин кўпайтириш ва туристик хизматлар кўламини жадал кенгайтириш орқали туризмнинг иқтисодиётдаги ўрни ва аҳамиятини ошириш чора-тадбирлари тўғрисида”ги фармонида белгиланишича, бунда платформа орқали жойлаштириш воситаларини онлайн банд қилган Ўзбекистон фуқароларига шахсни тасдиқловчи ҳужжатсиз MyID тизими орқали идентификациядан ўтишга рухсат берилади.
Платформага уланган жойлаштириш воситаларининг шахсий кабинетида меҳмонни QR код ёки юз орқали идентификация қилиш имконияти яратилади.
Ҳужжатда 2025 йил 1 сентябрга қадар платформа орқали ахборот алмашинуви йўлга қўйилиши лозим бўлган вазирлик ва идораларнинг рўйхати келтирилди. Унга кўра,
- июнгача — “Авиачипталарни харид қилиш ва бошқариш” ахборот тизими;
- августгача — “Темирйўл чипталарини харид қилиш ва бошқариш ахборот тизими”, кадастр объектлари тўғрисидаги маълумотлар, туризм соҳасига оид йиғма статистик маълумотлар, MyID ахборот тизими, алоқа операторининг туристлар ҳаракатлари тўғрисидаги маълумотлари (шахсга доир бўлганларидан ташқари), банкоматлар тўғрисидаги маълумотлар; чет эл фуқароларнинг Ўзбекистонга киргани ва чиққани ҳақида маълумотлар
- июлгача — “Автотиcкет.уз” ахборот тизими; ATTO ахборот тизими;
- сентябргача — “Ижара.солиқ.уз” ахборот тизими;
- декабргача — электрон виза бериш тизими, билет операциялари ягона электрон тизими
- 2026 йил июлгача — Рақамли соғлиқни сақлаш платформаси ахборот алмашинуви йўлга қўйилиши керак.
Миллий туризм ягона платформаси ҳақида
Шавкат Мирзиёев раислигида ҳудудларда туризм инфратузилмасини яхшилаш ва хорижий туристлар оқимини янада кўпайтириш чора-тадбирлари юзасидан 2024 йил 3 июнь куни ўтказилган видеоселектор йиғилишида сайёҳлар маҳаллий рейсларга самолёт ва поезд учун икки ой у ёқда турсин, ярим йил олдин чипта олишда қийинчиликларга дуч келаётгани қайд этилганди. Мутасаддиларга барча қатновлар ҳақида маълумот ва чипта олиш имконини берадиган ягона онлайн платформани ишга тушириш топширилганди.
Президентнинг 2024 йил 18 июлдаги фармонида ушбу платформа 2024 йил 1 декабргача ишга туширилиши кўзда тутилганди. Ўша йилнинг декабрида туристик хизматларни ягона платформага бирлаштириш чора-тадбирлари тўғрисидаги ҳукумат қарори қабул қилинди. Қарорга кўра, ушбу платформа 2025 йил 1 сентябрдан бошлаб синов тариқасида, 2025 йил 1 декабрдан эса тўлиқ ишга туширилади. Платформа маълумотларининг 14 та хорижий тилга таржимаси таъминлаб борилади.
Изоҳ (0)