O‘zbekiston elchisi Andorra hamraisi, Urxelsk yepiskopiga ishonch yorliqlarini topshirdi, deb xabar bermoqda “Dunyo”.
Unga ko‘ra, O‘zbekistonning Andorraga yangi tayinlangan elchisi (qarorgohi Madrid shahrida joylashgan) Farrux Tursunov Andorra knyazi-hamraisi, Urxelsk yepiskopi Joan Enrik Vives-i-Sisilga ishonch yorliqlarini topshirdi.
Tantanali marosimdan so‘ng bo‘lib o‘tgan suhbat chog‘ida Urxelsk yepiskopi elchini qutlab, O‘zbekistonda kechayotgan o‘zgarishlar jarayonlarini katta qiziqish bilan kuzatib borishini ta’kidladi. U, shuningdek, mamlakat rahbariyatining bugungi murakkab geosiyosiy sharoitda tinchlik, barqarorlik va xalqaro muloqotni ta’minlashga qaratilgan oqilona va uzoqni ko‘zlagan siyosatini yuksak baholadi.
Andorra hamraisi O‘zbekiston millatlararo va konfessiyalararo totuvlikning muvaffaqiyatli namunalarini ko‘rsatayotgani, 130 dan ortiq millat va elatlar, shuningdek, 2000 dan ortiq diniy tashkilotlar tinch va o‘zaro hurmat muhitida istiqomat qilayotganini e’tirof etdi.
Shuningdek, u davlat siyosatining ijtimoiy yo‘nalishi va O‘zbekistonning xalqaro kun tartibidagi faol ishtirokini ta’kidladi. “Mamlakatingizda deyarli har oyda butun dunyodan vakillik delegatsiyalari ishtirok etadigan yirik xalqaro tadbirlar o‘tkazilmoqda”, dedi Urxelsk yepiskopi Enrik Vives-i-Sisilga.
Andorra kichik bo‘lishiga qaramay, O‘zbekiston bilan munosabatlarni rivojlantirishga katta ahamiyat berayotgani, uni muhim va hurmatli hamkor sifatida qabul qilishi alohida qayd etildi.
Yepiskop O‘zbekistonning iqtisodiy dinamikasini, jumladan, COVID-19 pandemiyasi davrida mamlakat barqaror o‘sish sur’atlarini ko‘rsatib, inqirozdan ijobiy ko‘rsatkichlar bilan chiqqanini diqqat bilan kuzatib borgani samarali islohotlar samarasi ekanini bildirdi.
O‘zbekistonning sayyohlik salohiyati, xususan Samarqand shahrining buyuk tarixi va madaniy merosiga e’tibor qaratildi. Bundan tashqari, Andorra hamraisi O‘zbekistonga tashrif buyurish istagini bildirdi va andorralik yoshlarning boy tarix va madaniyatga ega mamlakatlarga qiziqishi ortib borayotgani, O‘zbekiston esa bunday yo‘nalishlar orasida alohida o‘rin tutayotganini ta’kidladi.
Uchrashuv yakunida tomonlar O‘zbekiston va Andorra o‘rtasida turli sohalar, jumladan, madaniyat, turizm va xalqaro muloqot kabi ikki tomonlama hamkorlikni yanada mustahkamlashdan o‘zaro manfaatdor ekanliklarini tasdiqladi.
O‘zbekiston va Andorra o‘rtasidagi diplomatik munosabatlar 2009-yil 1 dekabrda o‘rnatilgan. Farrux Tursunov O‘zbekistonning Ispaniyadagi favqulodda va muxtor elchisi sifatida 2023-yil 7-dekabr kuni Madrid shahriga tashrif buyurgan edi. Diplomat 2024-yilning aprel oyida O‘zbekiston elchisi sifatida Ispaniya Qiroli Filipp VI ga ishonch yorliqlarini topshirgan.
Shuningdek, Farrux Tursunov mamlakatning “BMT Turizm” tashkilotidagi (avvalgi Butunjahon turizm tashkiloti) doimiy vakili hisoblanadi.
Bundan tashqari, elchi Farrux Tursunov shu mart oyida Andorra hamraisi, Fransiya prezidenti Emmanuel Makronga ishonch yorliqlarini topshirgan edi.
2025-yil 31-yanvarda Baxtiyor Ibragimov O‘zbekistonning Albaniyadagi birinchi elchisi etib tayinlangani haqida xabar berilgan edi. Ravshan Usmonov esa O‘zbekistonning Islandiyadagi (qarorgohi London shahrida joylashgan) elchisi etib tayinlandi va 7-fevral kuni Islandiya prezidenti Xalla Tomasdottirga ishonch yorliqlarini topshirdi. 11-fevral kuni O‘zbekiston elchisi Temur Rahmonov Litva prezidenti Gitanas Nausedaga ishonch yorliqlarini topshirdi.
Izoh (0)