“Самарқандим” журналининг илк сони нашрдан чиқди

Самарқанд давлат университети муассислигида “Самарқандим” номли илмий-сиёсий, илмий-маърифий, тарихий, оммабоп журнал нашрдан чиқди. Журнал мундарижаси ранг-баранг. Унда олис ўтмиш садолари, кечаги кунлар ўкинч-армонлари, Ватан қадри, дунёга янгича нигоҳлар ила боқаётган янги Самарқанд – ҳамма-ҳаммаси мужассам.

“Инсонга ота-онани ва Ватанни танлаш имконияти берилмаган. Дунёга келган ва киндик қонимиз тўкилган манзил Ватан ҳисобланади. 

Худди ота-онани норизо этиб бўлмаганидек, Ватанни ҳам ёмонотлиқ қилишдан сақланиш керак”...

Ёки “Мен Ватани ҳақида бўлар-бўлмас гаплар тарқатаётганларга ачинаман. Кимларнидир ноғорасига ўйнаётганлар ожиз, нотавон кимсалардир.

Ватани ҳақида бир нохуш хабарни кстаётганлар, Ватанни муаммоларини ошкор қилаётганлар, Ватан ҳақида турли хил иғво ва буҳтонларни бор овози билан айтаётганлардан ҳазар қиламан.

Ватан билан виждон сўзи ёнма-ён қўйилиши, бирга туриши зарур. Ватан ҳақида гапираётганингизда виждонингизни ўртага қўйинг. Аждодларингизни, авлодларингизни тавқи лаънатга қолдирманг. Бу Ватан кимларни кўрмаган. Кимлар ўтмаган бу заминдан. Лекин Ватан мангу қолган... 

Ҳар қандай гуноҳни кечирса бўлади. Фақат Ватан  ва ота-она олдида қилинган гуноҳдан ташқари”...

Ёки Шарофат Йўлдошеванинг “Одамийлик илми ёки Афросиёбни ким сақлаб қолган?” мақоласидаги ушбу битикларга эътибор қаратинг: 

“Самарқанддан нохуш хабар келди. Яҳё Ғуломов дарҳол қадим шаҳарга учди. Лойиҳа бўйича Тошкент – Самарқанд йўли Афросиёбнинг қоқ ўртасидан ўтиши кўзда тутилиб, бу ерда қудратли бульдозерлар ишлаётган эди. 

– Вайронгарчиликни тўхтатинг, – академик тракторлардан бирининг олдига кўкрак кериб чиқади...

Худди шу дақиқаларда Самарқандда катта анжуман тантаналари бошланаётган эди.

Яҳё Ғуломов фоеда республика раҳбарини тўхтатиб мурожаат қилади: 

 – Анжуман тугагунча Афросиёбдан асар ҳам қолмайди. Агар шундай бўлса, тарих бизни кечирмайди”... 

Журналда қалбни жунбушга келтирадиган мақолалар бир талай. 

Лойиҳа муаллифи, Самарқанд давлат университети ректори, Ўзбекистон Республикаси фан арбоби, Олий Мажлис Сенати аъзоси Рустам Холмуродов.