O‘zbekiston Yozuvchilar uyushmasi a’zosi, taniqli shoir va dramaturg, “Do‘stlik” ordeni sohibi Haydar Muhammad 9-oktabr kuni 86 yoshida vafot etdi. Bu haqda uyushma matbuot xizmati xabar berdi.
Haydar Muhammad 1936-yili Toshkentda tug‘ilgan. 1966-yilda Nizomiy nomidagi Toshkent davlat pedagogika institutining kechki filologiya bo‘limini tugatgan. 1965—1976-yillarda O‘zbekiston teleradiosida muharrir, 1976—1980-yillarda Madaniyat ishlari vazirligida mas’ul vazifalarni bajargan. Ko‘p yillar Hamza nomli Akademik drama teatrida adabiy emakdosh vazifasida xizmat qilgan.
Uning birinchi she’riy to‘plami “Ko‘nglim mening” nomi bilan 1975-yilda nashr bo‘lgan. Shundan so‘ng “Olchamning tug‘ilgan kuni” (1978), “Yo‘llaringga mushtoqman” (1979), “Ipak gilamlar” (1990), “Hazilkash shoh” (Saylanma, 1994) kabi she’riy va dramatik asarlari, to‘plamlari chop etilgan.
Haydar Muhammad musiqa janrining juda ko‘p turlari uchun she’rlar yozgan. Respublika xalq teatrlari adibning “Ipak gilamlar”, “Navoiy bir kuni”, “Ulug‘bek sharofati”, “Beruniyning baxt eshigi”, “Sevgi jazavasi”, “Sobir Rahimov va xoin”, “Chiroyli ayolning iltimosi” kabi asarlarini sahnalashtirgan. Uning “Toshkentning nozanin malikasi”, “Ko‘ngil – chinni piyola”, “Kuyovlar konkursi” asarlari esa Tojikiston, Qirg‘iziston teatrlarida ham sahna yuzini ko‘rgan.
Haydar Muhammad tarjimasida ozarbayjon dramaturgi Anorning “Zanjir yoki qiyofalar” (Muqimiy teatri), turkman dramaturgi H. Muxtorning “Nevarali kelin” (Samarqandagi H. Olimjon nomli teatr), boshqird dramaturgi Farid Bogdanovning “Tungi mehmon” (Hamza nomli o‘zbek Davlat akademik drama teatri) kabi asarlari o‘zbek sahnasiga chiqqan.
Izoh (0)