O‘zbekistonda 2025-yil 1-iyuldan yangi tashkil etiladigan ta’lim tashkilotlari faoliyatini yo‘lga qo‘yish ikki bosqichda amalga oshiriladi.
Bu prezidentining 5-mayda imzolangan “Ta’lim sifatini ta’minlash va ta’lim xizmatlari ko‘rsatish tizimini takomillashtirish bo‘yicha qo‘shimcha chora-tadbirlar to‘g‘risida”gi farmonida nazarda tutilgan.
Birinchi bosqichda faoliyatni boshlash uchun o‘rta maxsus, kasbiy, oliy va oliy ta’limdan keyingi ta’lim tashkilotlari o‘rnatilgan tartibda lisenziyalanadi, kadrlarni qayta tayyorlash va ularning malakasini oshirish ta’lim tashkilotlari xabardor qilish tartibida tashkil etiladi.
Ikkinchi bosqichda ta’lim tashkilotlarining kadrlar tayyorlash yo‘lga qo‘yiladigan ta’lim dasturlari (kasblar, ta’lim yo‘nalishlari, mutaxassisliklar, ixtisosliklar, kurslar) maxsus davlat akkreditatsiyasidan o‘tkaziladi.
Bunda maxsus davlat akkreditatsiyasidan o‘tmagan ta’lim dasturlari bo‘yicha ta’lim oluvchilarni o‘qishqa qabul qilishga yo‘l qo‘yilmaydi. Maxsus davlat akkreditatsiyasidan o‘tmasdan qabul jarayonini amalga oshirish litsenziya talab va shartlarini qo‘pol ravishda buzish deb baholanadi va ta’lim tashkilotiga berilgan litsenziyaning bekor qilinishiga (faoliyatining to‘xtatilishiga) asos bo‘ladi.
Prezidentning yuqoridagi farmoni bilan “Taʼlim sohasidagi loyihalar markazi” loyiha ofisi negizida Prezident administratsiyasi huzurida Taʼlim sifatini taʼminlash milliy agentligi tashkil etiladi. 2025/2026-o‘quv yilidan boshlab ta‘limning sirtqi shakliga qabul tugatildi.
Izoh (0)