Dunyodagi eng baland osmono‘par binolardan birining qurilishi keyingi haftada, ishlar to‘xtatilganidan deyarli 10 yil o‘tib qayta tiklanishi mumkin. Bu haqda CNN nashri Xitoy davlat OAVga tayanib xabar bermoqda.
Xitoy shimolida joylashgan Tyanszin port-shaharda qad ko‘targan, ammo 2015-yildan beri moliyaviy qiyinchiliklar tufayli qurilishi to‘xtab qolgan 597 metrlik Goldin Finance 117 osmono‘par binosi 2027-yilda qurib bitkazilishi kutilmoqda.
117 qavatli minora 2008-yildayoq Xitoyning eng baland osmono‘par binosi bo‘lishi kutilgan edi. Bu inshoot kuchli shamol va zilzilalarga bardosh bera olishi uchun ulkan ustunlar yordamida qurilgan. Eng yuqorisida suzish havzasi va kuzatish maydonchasi bo‘lishi rejalashtirilgan. P&T Group arxitektorlarining aytishicha, yuqori qavatlarda ofislar va besh yulduzli mehmonxona joylashadi.
Ammo loyiha 2015-yilda Xitoy fond bozorining qulashi ortidan to‘xtab qolgan. Bu esa Gonkongda joylashgan Goldin Properties Holdings kompaniyasining kelajagiga jiddiy xavf tug‘dirgan. Bu kompaniya rahbari va Goldin Finance 117 asoschisi Pan Sutong bir paytlar Gonkongning eng boy tadbirkorlaridan biri bo‘lgan bo‘lsa-da, bu iqtisodiy tanglik oqibatida loyihani to‘xtatishga majbur bo‘lgan.
Binoning qayta qurilishi 569 million yuan (78 million dollar)ga baholanmoqda. Biroq davlat ommaviy axborot vositalariga ko‘ra, endi sobiq quruvchining nomi bino qurilishiga aloqador bo‘lmaydi. Osmono‘par binodan foydalanish rejalari o‘zgarishsiz qolish yoki qolmasligi hali qorong‘i.
Goldin Finance 117 balandligi bo‘yicha Shanxay minorasi va Shenchjendagi Ping An moliya markazidan o‘zib ketadi. Qurib bitkazilgandan keyin u mamlakatdagi uchinchi (dunyodagi oltinchi) eng baland osmono‘par binoga aylanishi kutilyapti.
Dushanba kuni Xitoyning Greenland Group kompaniyasi janubi-g‘arbiy Chendu shahridagi ilgari to‘xtab qolgan Chendu Grenlandiya minorasi ustida ham ishlar qayta tiklanayotganini ma’lum qildi. Balandligi 468 metr bo‘lgan osmono‘par bino qurilishi 2023-yilda to‘xtatib qo‘yilgan. Sababi quruvchi moliyaviy qiyinchiliklarga duch kelgan, deb yozadi Reuters.
Iqtisodiy qiyinchiliklar kuchayishiga qaramay, Xitoy osmono‘par binolar qurilishi bo‘yicha dunyoda yetakchilikni qo‘ldan boy bermayapti. Baland binolar va shahar muhiti bo‘yicha kengash ma’lumotlariga ko‘ra, o‘tgan yili butun dunyo bo‘ylab qurib bitkazilgan 200 metr va undan baland 133 ta osmono‘par binoning 91 tasi Xitoyda qurilgan.
Izoh (0)