O‘zbekistonda mart oyida 20,16 mlrd so‘mlik elektrdan noqonuniy foydalanilgani aniqlandi. Bu haqda “Hududiy elektr tarmoqlari” xabar berdi.
Qayd etilishicha, hududlarda “Hududiy elektr tarmoqlari” AJ hamda tizim tarkibidagi korxonalar komplayens nazorat tuzilmalari tomonidan yoqilg‘i-energiya resurslarini talon-toroj qilish holatlarini aniqlash va ularga nisbatan tegishli choralar ko’rish yuzasidan tadbirlar o‘tkazilmoqda.
Xizmat xodimlari tomonidan joriy yilning mart oyi davomida o‘tkazilgan reyd tadbirlari davomida qiymati 20,16 mlrd so‘mlik 14,08 mln kVt/soat elektr energiyasidan qonunga xilof ravishda foydalanish holati aniqlandi.
To‘plangan materiallar yuzasidan qayta hisob-kitob qilinib, hujjatlar huquqni muhofaza qiluvchi organlarga yuborilgan. Elektr energiyasidan foydalanish qoidalariga rioya qilish bo‘yicha chora-tadbirlar davom etmoqda.
Bunday holatlar soni ortib bormoqda
Samarqand viloyatidagi korxonalardan biri 553 million so‘mlik elektrdan noqonuniy foydalangani aniqlangandi. Shu bilan birga Qashqadaryoda 177 mln so‘mlik gaz va “svet”dan noqonuniy foydalangan shaxslar ushlangani xabar qilingandi.
Shuningdek, Qashqadaryoda elektrdan noqonuniy foydalangan korxona davlatga 1 mlrd so‘mdan ziyod zarar yetkazgan. Bundan tashqari, Toshkent, Samarqand va Qashqadaryo viloyatlarida energiya resurslariga noqonuniy ulanish holatlari fosh etilgandi. Shuningdek:
- Buxoroda 1,2 mlrd so‘mlik elektrdan noqonuniy foydalanilgani aniqlandi
- Qoraqalpog‘istonning uchta hududida 845 mln so‘mlik gazdan noqonuniy foydalanildi
- Buxoro va Jizzaxda elektrdan noqonuniy foydalanganlar 360 mln so‘mdan ziyod zarar yetkazdi
- Uchta viloyatda qariyb yarim mlrd so‘mlik gazdan noqonuniy foydalanildi
Izoh (0)