Qashqadaryo viloyatining Koson tumanida qurilish ishlari olib borilayotgan ko‘p qavatli binoda elektr energiyasidan noqonuniy foydalanish holati fosh etildi. Bu haqda “O‘zenergoinspeksiya” xabar berdi.
Maʼlum qilinishicha, Koson tumanida joylashgan “A.M-S.” MChJga qarashli qurilish ishlari olib borilayotgan ko‘p qavatli turar joy binosida o‘zboshimchalik bilan elektrdan noqonuniy foydalanilgan.
Ushbu qoidabuzarlik natijasida elektr ta’minoti korxonasiga 298 mln so‘mlik zarar yetkazilgan.
Hozirda huquqni muhofaza qilish organlari tomonidan tergovga qadar tekshiruv ishlari olib borilmoqda.
Bundan tashqari, Namangan viloyatining Uychi tumanida 422,5 mln so‘mlik elektrdan noqonuniy foydalangan savdo do‘koni aniqlandi. Bu haqda Bosh prokuratura huzuridagi departament xabar berdi.
Qayd etilishicha, Uychi tumanida “J.M.” YATT “Beruniy” MFY hududidagi savdo do‘konida tijorat maqsadida umumiy foydalanishdagi elektr tarmog‘iga o‘zboshimchalik bilan ulanib, 422,5 mln so‘mlik elektrdan noqonuniy foydalangan.
Mazkur holat yuzasidan Jinoyat kodeksining 169-moddasi (o‘g‘rilik) bilan jinoyat ishi qo‘zg‘atilib, tergov harakatlari o‘tkazilmoqda.
Bunday holatlar soni ortib bormoqda:
Samarqand viloyatidagi korxonalardan biri 553 million so‘mlik elektrdan noqonuniy foydalangani aniqlangandi. Shu bilan birga Qashqadaryoda 177 mln so‘mlik gaz va “svet”dan noqonuniy foydalangan shaxslar ushlangani xabar qilingandi.
Shuningdek, Qashqadaryoda elektrdan noqonuniy foydalangan korxona davlatga 1 mlrd so‘mdan ziyod zarar yetkazgan. Bundan tashqari, Toshkent, Samarqand va Qashqadaryo viloyatlarida energiya resurslariga noqonuniy ulanish holatlari fosh etilgandi. Shuningdek:
- Buxoroda 1,2 mlrd so‘mlik elektrdan noqonuniy foydalanilgani aniqlandi
- Qoraqalpog‘istonning uchta hududida 845 mln so‘mlik gazdan noqonuniy foydalanildi
- Buxoro va Jizzaxda elektrdan noqonuniy foydalanganlar 360 mln so‘mdan ziyod zarar yetkazdi
- Uchta viloyatda qariyb yarim mlrd so‘mlik gazdan noqonuniy foydalanildi
Izoh (0)