Litva hukumati Markaziy Osiyo mamlakatlari fuqarolari uchun migratsiya siyosatini o‘zgartirmoqchi. Bu haqda LRT xabar berdi.
Xabarga ko‘ra, Markaziy Osiyo davlatlarining o‘nga yaqin fuqarosiga terrorchilik tashkilotlari bilan aloqasi va radikallashuvi ehtimoli tufayli Litvaga kirish taqiqlangan. Shu sababli Litva bosh vaziri Gintautas Paluchkas immigratsiya siyosatini qayta ko‘rib chiqishga chaqirmoqda.
Afsuski, ayrim davlatlardan kelgan shaxslar radikallashuvga ko‘proq moyil ekanini tan olishimiz zarur. Bizga madaniy jihatdan yaqinroq bo‘lgan hududlarda malakali ishchi kuchini faol ravishda izlashimiz kerak, degan bosh vazir.
Litva davlat xavfsizlik xizmati rahbari Daryus Yaunishkis esa mamlakatda Markaziy va Janubiy Osiyodan kelgan muhojirlarning radikallashuvi ehtimoli yuqori ekanini aytgan. Shu sababli kelajakda migratsiya siyosatini qayta ko‘rib chiqish rejalashtirilmoqda. Litva bosh vaziri viza berish jarayonida endi madaniy yaqinlikka ko‘proq e’tibor qaratish kerakligini ta’kidladi.
Bugungi kunda bizda ko‘plab tashqi viza markazlari yoki hujjatlarni ko‘rib chiqish markazlari mavjud, ammo ularning bari madaniy yaqinlik talablariga javob bermaydi. Shu sababli migratsiya siyosatini, albatt, qayta ko‘rib chiqishni rejalashtiryapmiz, dedi siyosatchi.
O‘zbekiston Markaziy banki tahlili so‘nggi yillarda o‘zbekistonlik migrantlar ishlash uchun Yevropa Ittifoqi mamlakatlariga ham avvalgi davrlardagidan ko‘proq borayotganini ko‘rsatmoqda. Jumladan, Polsha (YIga berilgan vizalarning 21 foizi), Litva (17 foiz), Germaniya (16 foiz) va Latviyaga (7 foiz) ishga joylashish maqsadidagi safarlar soni ortgan.
Buyuk Britaniya tomonidan mehnat muhojirlariga bo‘lgan mavsumiy talab ham saqlanib qolmoqda. O‘zbekiston fuqarolariga berilayotgan mavsumiy vizalar barcha mavsumiy berilgan vizalarning qariyb 13 foizini tashkil etgan. Bunda Buyuk Britaniya tomonidan O‘zbekiston fuqarolariga 2021-yilda 556 ta, 2022-yilda 4228 ta, 2023-yilda esa 4094 ta viza berilgan.
O‘z navbatida, Koreyaga umumiy migratsion oqim oshib bormoqda. Bunda asosan taʼlim va ishlash maqsadlari birlamchi ahamiyatga ega.
Izoh (0)