“Napoli” hujumchisi Romelu Lukaku Italiya A Seriyasida urilgan gollar soni bo‘yicha Krishtianu Ronalduni ortda qoldirdi. Bu haqda Euro-Football nashri xabar bermoqda.
31 yoshli belgiyalik futbolchi “Empoli”ga qarshi bahsda (3:0) o‘z darajasini yana bir bor namoyon etdi — futbolchi uchrashuvda bitta gol va ikki golli uzatma muallifiga aylandi. Hozirda Lukaku A Seriyada 82 ta gol muallifiga aylanib, Ronaldu natijasidan o‘tib ketdi. Portugaliyalik hujumchi o‘z hisobiga 81 gol yozib qo‘yishni uddalagan.
Shuni ta’kidlash lozimki, Lukaku bunday natijaga 159 o‘yinda erishgan bo‘lsa, Ronaldu 98 uchrashuvda 81 marta raqib darvozasini ishg‘ol qilgan.
Eslatib o‘tamiz, Krishtianu Ronaldu 2018–2021-yillar oralig‘ida “Yuventus” safida harakat qilgan. Lukaku “Napoli”ga kelguniga qadar “Inter” va “Roma” jamoalarida to‘p surgan.
Ushbu mavsumda Lukaku A Seriyada 30 uchrashuvda maydonga tushib, o‘z hisobiga 12 ta gol va 10 ta golli uzatma yozdirib qo‘ygan.
Izoh (0)