Yevropada transferlar bozori qaynamoqda. 29-avgust kunida ham bir qancha transferlar amalga oshirildi.
Romelu Lukaku — “Chelsi”dan “Napoli”ga
“Chelsi” hujumchisi Romelu Lukaku “Napoli” safiga borib qo‘shildi. Belgiyalik hujumchi yangi jamoasi bilan 2027-yilgacha mo‘ljallangan shartnoma imzoladi. Neapolliklar Lukaku uchun 30 million yevro hamda qo‘shimcha bonuslar to‘lab beradi.
Federiko Kyeza — “Yuventus”dan “Liverpul”ga
26 yoshli italiyalik futbolchi faoliyatini “qizillar” klubida davom ettiradi. Mersisaydliklar Kyeza uchun 13 million yevro to‘lab beradi.
Avvalroq Federikoga Kataloniyaning “Barselona”si ham qiziqayotgani xabar qilingandi. Biroq “ko‘k-anorranglilar” ushbu transfer bo‘yicha “Liverpul”ga imkoniyatni boy berdi.
Kepa Arrisabalaga — “Chelsi”dan “Bornmut”ga (ijara asosida)
“Bornmut” 29 yoshli darvozabonni bir mavsumga ijaraga olganini e’lon qildi. Kepa o‘tgan mavsum “Real” safida ijara asosida o‘ynagan edi va La Liga doirasida 14 ta o‘yinda maydonga tushgan.
Tino Anjorin — “Chelsi”dan “Empoli”ga
London klubi yarim himoyachining italyan klubiga o‘tganini ma’lum qildi. “Chelsi” futbolchining keyingi transferidan 50% huquqini o‘zida saqlab qoldi.
22 yoshli Anjorin o‘tgan mavsumni “Portsmut” safida ijara asosida o‘tkazgan va 12 ta o‘yinda bitta golga mualliflik qilgan.
Kataloniyaning “Barselona” jamoasi yozda yirik transferlarni amalga oshira olmaydi. Marca nashrining xabariga ko‘ra, kataloniyaliklar “Atletik” a’zosi Niko Uilyamsni ham, “Milan” hujumchisi Rafael Leauni ham sotib ololmaydi.
“Ko‘k-anorranglilar” Nike bilan muzokaralarni deyarli yakuniga yetkazdi. Biroq, hamkorlik to‘g‘risida sentyabr boshlarida e’lon qilinadi. Shuning uchun avgust oyi oxiriga qadar “Barselona” transferlarni amalga oshirishga ulgurmaydi.
Izoh (0)