Dunyo va o‘zbek sportiga oid 26-noyabr tongining eng muhim xabarlari dayjesti bilan tanishing.
O‘zbekiston
Superliga so‘nggi turining ikkita o‘yinida VAR ishlaydi, Termizdagi bahsda darvozalar ortida ishlovchi hakamlar bo‘ladiSuperliganing so‘nggi turidan o‘rin olgan uchrashuvlar 27-noyabr, shanba kuni bo‘lib o‘tadi. PFL mazkur uchrashuvlarga biriktirilgan hakamlar ro‘yxatini ma’lum qildi. Unga ko‘ra, “OKMK” — “So‘g‘diyona” va “Nasaf” — “Lokomotiv” o‘yinlarida VAR tizimi ishlaydi.
“Surxon” — “Mash’al” uchrashuvida esa darvozalar ortidagi hakamlar faoliyat yuritadi.
Jahon
Chempionlar Ligasida 5-turning eng yaxshi o‘yinchisi va hafta ramziy terma jamoasi aniqlandi
Pedru Gonsalvesh (“Sporting”) Chempionlar Ligasida haftaning eng yaxshi o‘yinchisi deb topildi. 23 yoshli futbolchi “Borussiya D”ga qarshi bahsda (3:1) dubl va bitta golli uzatma qayd etgandi.
Shuningdek, quyidagi o‘yinchilar mazkur nom uchun kurash olib borgandi:
- Edin Jeko (“Inter”) — “Shaxtyor”ga qarshi bellashuvda (2:0) ikkita gol;
- Sebastyan Aller (“Ayaks”) — “Beshiktosh”ga qarshi o‘yinda (2:1) dubl;
- Emil Forsberg (“Leypsig”) — “Bryugge”ga qarshi uchrashuvda (5:0) 2 ta gol.
Darvozabon: Tibo Kurtua (“Real M”);
Himoyachilar: David Alaba (“Real M”), Niklas Otamendi (“Benfika”), Nataniel Chaloba, Ris Jeyms (ikkisi “Chelsi”), Pedro Porro (“Sporting”);
Yarim himoyachilar: Tiago Alkantara (“Liverpul”), Kristofer Nkunku, Emil Forsberg (ikkisi “Leypsig”), Pedru Gonsalvesh (“Sporting”);
Hujumchi: Edin Jeko (“Inter”).
“Roma” Konferensiyalar Ligasi pley-off yo‘llanmasiga ega chiqdi, “Tottenhem” guruhda qolib ketishi mumkin
25-noyabr kuni Yevropa Ligasi va Konferensiyalar Ligasi 5-turidan o‘rin olgan uchrashuvlar bo‘lib o‘tdi. “Roma” o‘z uyida “Zarya”ni yirik hisobda mag‘lub etib (4:0), muddatidan avval keyingi bosqich masalasini hal qildi. “Tottenhem” esa hakam tomonidan qo‘shib berilgan vaqtda gol o‘tkazib, mag‘lubiyatga uchradi (1:2). Shu tariqa Antonio Konte qo‘l ostida ilk mag‘lubiyatini qabul qilib olgan “shporlar” qiyin vaziyatda qoldi. So‘nggi turda londonliklar guruh peshqadami “Renn”ni yengishi va “Vitess”ning ochko yo‘qotishini kutishga majbur.
Yevrokuboklar bahorida Ukraina klublari bo‘lmaydi
“Zarya” “Roma”ga yengilgan holda guruhda qolib ketdi. Shu tariqa Ukrainaning uchinchi klubi ham Yevrokuboklar pley-off bosqichidan quruq qoldi. Avvalroq “Dinamo Kiyev” va “Shaxtyor” Chempionlar Ligasi 1/8 finaliga chiqish imkoniyatini yo‘qotgandi.
Ketma-ket to‘rtinchi mavsum Chempionlar Ligasi 1/8 finalida Ukraina klubi o‘ynamaydigan bo‘ldi. shuningdek, 2007/08-yilgi mavsumdan keyin ilk bor Yevropa Ligasi pley-off bosqichida ukrain klubi bo‘lmaydi.
Ralf Rangnik “Manchester Yunayted” bosh murabbiyiga aylanadi
Moskvaning “Lokomotiv” klubi sport va rivojlanish bo‘yicha rahbari Ralf Rangnik faoliyatini APLda davom ettirishi mumkin.
The Athletic xabariga ko‘ra, 63 yoshli mutaxassis “Manchester Yunayted”ni boshqarishga rozilik bergan. Tomonlar 6 oylik shartnoma imzolaydi. Keyin esa mutaxassis “Yunayted” bilan yana 2 yillik bitim imzolab, maslahatchi sifatida faoliyat yuritadi.
Manchester Evening News’ga ko‘ra, Rangnik avvaliga mankunianlar taklifini rad etgan, biroq yaxshilangan ikkinchi taklifdan keyin rozilik bergan.
Ayni vaqtda Ralf Angliyada bo‘lib turibdi va klub bilan shartnoma imzolashga yaqin. Moskvaliklar 26-noyabr kuni uning ketganini rasman e’lon qiladi, deya xabar qilmoqda “Chempionat”.
Ralf Rangnik “Leypsig”dagi faoliyati orqali futbol olamiga tanilgan.
Globe Soccer Awards—2021 sovriniga da’vogar futbolchi va murabbiylar ro‘yxati e’lon qilindi
- Eng yaxshi murabbiy nomiga da’vogarlar: Antonio Konte (“Tottenhem”), Lyuis Kortes (“Barselona” ayollar jamoasi sobiq ustozi), Didye Desham (Fransiya), Unai Emeri (“Vilyarreal”), Xans-Diter Flik (Germaniya), Kristof Galte (“Nitssa”), Pep Gvardiola (“Manchester Siti”), Kasper Yulmand (Daniya), Roberto Manchini (Italiya), Lionel Skaloni (Argentina), Diyego Simeone (“Atletiko”), Garet Sautgeyt (Angliya), Tite (Braziliya) va Tomas Tuxel (“Chelsi”).
- Eng yaxshi futbolchi bo‘lishga nomzodlar: Janluiji Donnarumma, Markinyos, Neymar, Killian Mbappe, Marko Verratti, Lionel Messi (barchasi – “PSJ”), Sesar Aspilikueta, Jorjinyo, Ngolo Kante, Romelu Lukaku (barchasi – “Chelsi”), Yozua Kimmix, Tomas Myuller, Robert Levandovski (barchasi – “Bavariya”), Brunu Fernandesh, Krishtianu Ronaldu (ikkisi – “Manchester Yunayted”), Kevin de Bryuyne, Ruben Diash (ikkisi – “Manchester Siti”), Karim Benzema (“Real”), Federiko Kyeza (“Yuventus”), Erling Holand (“Borussiya D”), Harri Keyn (“Tottenhem”), Muhammad Saloh (“Liverpul”).
Izoh (0)