Iyul oyining boshida Yevgeniy Savin o‘z kanalida Eldor Shomurodov bilan intervyusini e’lon qildi. Savin “Jenoa” hujumchisidan “Joze Mourinyoning short-listiga kirganingni eshitdingmi?”, deb so‘radi.
“Eshitganim yo‘q, to‘g‘risi. Yaxshi jamoaga o‘tishdan qo‘rqmayman. Nimaga qodirligimni bilmoqchiman. Sinab ko‘rgan bo‘lardim”, — degandi Eldor.
Ushbu video e’lon qilingandan bir oy o‘tib Shomurodov “Roma” futbolchisiga aylandi. 7-avgustda esa “Betis”ga qarshi o‘rtoqlik uchrashuvida (2:5) rimliklar safidagi birinchi golini urdi.
Eldor nega aynan Rim jamoasida paydo bo‘ldi? U Joze Mourinyo bilan ishlay oladimi? Bu savollarga rossiyalik mashhur tahlilchilar Vadim Lukomskiy va Yuriy Shevchenko javob qidirib ko‘rdi.
Eldor va “Jenoa”ning manfaatlari bir-biriga mos keldi. Shomurodov top-jamoaga o‘tishni, “Jenoa” esa futbolchini yaxshiroq narxga sotishni istagandi
Italiyalik jurnalist Janluka di Marsioning so‘ziga qaraganda, “Jenoa” Shomurodov bilan tasodifan shartnoma imzolagan.
Jamoa prezidenti Enriko Pretsiozi Mario Balotellini olib kelishni istagandi, lekin sport direktori Daniele Fajano va murabbiy Rolando Maran (ikkalasi ham o‘tgan mavsum jamoadan ketdi) qarshi chiqdi. Maran boshqa hujumchi topishni maslahat berdi.
“Fajano agent Gabriel Juffrido bilan (u “Jenoa”da o‘ynagan Kshishtof Pyontek bilan ham birga ishlaydi) Shomurodov nomzodini ilgari surdi, Maran darhol rozi bo‘ldi. Chunki u prezident Balotelli olib kelmasidan oldinroq harakat qilishi zarur edi.
Lekin Pretsiozining roziligisiz bu transfer amalga oshmasdi. ‘Prezident — juda aqlli tadbirkor’. U Shomurodovni ko‘rganidan so‘ng transferga rozi bo‘ldi. Hozir uni 7-8 millionga sotib olsa, bir-ikki yildan so‘ng bemalol 20-25 millionga sotish mumkinligini tushundi.
Agarda Pretsioziga ko‘proq pul bersangiz, u hamma narsani — hattoki, oyog‘ini ham sotishga tayyor”, — deydi di Marsio hazil aralash.
Shomurodov uchun Italiya ideal variant edi. RPL u uchun top-chempionatga tayyorgarlik vazifasini o‘tadi.
Qatar va Xitoydan takliflar bor edi, lekin u yerda faqat pul ishlash mumkin. Men esa futbolchi sifatida rivojlanishni, doim Yevropada o‘ynashni xohlaganman. Italiyada o‘ynayapsanmi, demak seni butun dunyo kuzatyapti.Italiyadagi debyut mavsumida Shomurodov 8 ta gol urdi va “Jenoa”da ikkinchi to‘purarga aylandi (Mattia Destro 11 ta gol bilan to‘purar). La Gazzetta dello Sport Eldorning mavsumning eng yaxshi futbolchilari ichida 85-o‘ringa qo‘ydi. U Samir Handanovich, Marselo Brozovich, Kristian Eriksen (barchasi “Inter”), Jorjio Kyellini, Voytsex Shchesni (ikkalasi ham “Yuventus”), Dris Mertens (“Napoli”) kabi futbolchilardan oldinda turibdi.Eldor Shomurodov
“Italiya futboli o‘ylaganimdan ham murakkabroq ekan. Lekin men tanlovimdan qoniqdim. Faqatgina yuqori darajadagilarga qarshi o‘yinda o‘sish mumkin. “Jenoa”da o‘zimni qulay his qilyapman”, — degan edi may oyida Eldor.
Murabbiy Davide Ballardini yangi futbolchini maqtadi (“U chiroyli va samarali o‘ynaydi. Mashg‘ulotlarda angladimki, unda ajralib turadigan sifatlar bor. Umuman boshqacha futbol olamiga moslashish kerak, lekin unda ulkan salohiyat bor”), sport direktori Franchesko Marrokku ham Eldor haqida o‘z fikrlarini bildirib o‘tgandi: “Bu klubimiz uchun ajoyib topilma, Eldor kuchli futbolchi. Biz bundan juda xursandmiz”.
Qishda “Yuventus” Shomurodovga qiziqayotgani haqida xabarlar chiqa boshlagandi. Eldorning o‘zi ham: “U yerda o‘ynasam hech narsa yo‘qotmayman. Raqobatdan qo‘rqmayman, hattoki bu menga yoqadi ham”, — dedi. Eldor bilan birga ishlaydigan ProSports Management kompaniyasi rahbari German Tkachenko tezroq ketish mumkinligi va yuqoriroq darajaga chiqish imkoniyatini bera olishi uchun “Jenoa” tanlanganini yashirib o‘tirmadi. “Ular hujumchilarni tez sota oladi. Transferni amalga oshirayotganda shuni ham hisobga olgandik”, — deydi Tkachenko.
Pretsiozi “Jenoa”ni 2003-yilda sotib olgan. 18 yil davomida genuyaliklar juda ko‘p hujum chizig‘i vakillarini sotishga ulgurdi. Eng ko‘p pulni Kshishtof Pyontek keltirgan — yarim yilda uning transfer narxi 8 baravarga oshgan. “Jenoa” uni “Krakoviya”dan 4,5 millionga xarid qilib, 35 million yevroga “Milan”ga sotib yubordi.
Yozda “Jenoa” 18 yoshli erkin agent Aleksander Buksa bilan shartnoma imzoladi. Uning taqdiri qanday bo‘lishini taxmin qilish qiyin emas.
Shomurodovning “Roma”ga o‘tishiga asosiy sababchi — Mourinyo
Eldor omadli futbolchi. Agarda Joze Mourinyo “Roma”ga murabbiy bo‘lmaganida u ham Rimga kelmasdi. Jozega ma’lum bir xarakterga ega hujumchi kerak edi, Shomurodov esa Mourinyo qo‘l ostida to‘p surishni xohlardi.
“Mourinyoga muhabbat qayerdan? Barchasi oddiy. U — birinchi raqamli murabbiy. Men “Chelsi”ga muxlislik qilaman, Didye Drogba esa sevimli futbolchilarimdan biri”, — degandi Eldor 2021-yil yanvarda La Gazzetta dello Sport’ga bergan intervyusida.
German Tkachenko Mourinyoni Roman Abramovich orqali yaxshi biladi. Agent biznesmenga “Chelsi”ni sotib olishiga yordam bergan, Ernan Krespo, Adrian Mutu, Xuan-Sebastyan Veron, Samyuel Eto’O kabi futbolchilarning transferlarida qatnashgandi. Shuning uchun Shomurodovni kumiri bilan tanishtirib qo‘yish, keyin uni portugaliyalik mutaxassisga tavsiya qilish Tkachenko uchun muammo emasdi.
“German Mourinyo bilan uchrashish haqida hech narsa demadi. Shunchaki syurpriz borligini aytdi. Biz stol atrofida o‘tirganimizda Mourinyo kirib keldi. Avvaliga ishonmadim, keyin salomlashdik va ozroq suhbat qurdik. U Osiyo Kubogi haqida o‘z fikrini bildirdi. Tkachenko u yerda o‘ynaganimni, gol urganimni tushuntirdi. Mourinyo buni bilardi”, — deydi Shomurodov 2019-yilda Joze bilan uchrashuvini yodga olarkan.
“Joze ‘Tottenhem’da ishlab yurgan vaqtida menga qo‘ng‘iroq qilib, bench-option (zaxira o‘rindig‘i uchun) hujumchi kerakligini aytdi. Shunda men unga Osiyo Kubogida ko‘rgan, undan so‘ng uchrashgan bola haqida eslatdim. Keyin ular skaut yubordi, qanaqadir harakatlar bo‘ldi. Afsuski, hech narsa ro‘y bermadi, Eldor jiddiy jarohat tufayli gol ura olmayotgan vaqtga to‘g‘ri kelgandi. E’tibor bo‘ldi, ammo bu shunchaki do‘stona suhbat edi. Ammo bu Shomurodovning foydasiga deb hisobladik”.
Mourinyo Eldorni eslab qolgan ko‘rinadi.
Mourinyo Shomurodovning to‘psiz harakat qila olishini yuqori baholaydi va o‘tish epizodlarida uni kuchliroq qiladi
“Roma” bosh direktori Tiagu Pintu Eldorning Mourinyo futboliga moslashib ketishiga shubha qilmayapti: “Eldor — ulkan salohiyatga ega hujumchi. U “Roma”da o‘zini ko‘rsatishni istaydi. O‘ziga avvaldan tanish bo‘lgan ligada buni uddalay oladi. Bu xohish, shuningdek, Shomurodovning sifatlari Joze Mourinyoga mos keladi. Eldorni jamoada ko‘rib turganimizdan xursandmiz”.
Pintu qaysi xislatlar haqida gapirdi? Mourinyo uchun hujumchining himoyadagi (pressing va chuqur himoyada jamoaga yordam beradigan) va o‘tish epizodlarida (to‘pni yo‘qotganda va qarshi hujumlardagi harakatlar) sifatlari muhim.
Mourinyo himoyada o‘ynashni yaxshi ko‘radi — odatda uning jamoalari raqibni himoyada yoki maydon markazida kutib oladi, lekin yuqori bosim uyushtiradi. Mehnatsevarlik — Mourinyo tizimidagi hujumchilarning muhim sifatlaridan biri.
Bu borada Shomurodov Jozega mos tushadi. Pressingdagi harakatlari bilan butun A Seriya fonida ajralib turadi, uning asosiy faolligi raqiblarga bosim qilishida
Eldorni judayam maqtab yubormaslik uchun ba‘zi narsalarni ham aytib o‘tish lozim. “Jenoa” to‘pni kam nazorat qildi (18-o‘rin), shuning evaziga pressing qilish uchun ko‘proq imkoniyatga ega bo‘ldi. Jamoa raqiblarni oldingi chiziqlarda kutib olmaydi, lekin o‘zining intensiv o‘yini evaziga pressing-harakatlar bo‘yicha 2-o‘rinni egalladi. Bu esa raqamlarni osongina oshirib yuboradi.
Ikkinchi faktor — Shomurodovning o‘yin vaqti. U ko‘p o‘yin o‘tkazmadi: A Seriyaning 31 o‘yinida ishtirok etdi, ularning 16 tasini asosiy tarkibda boshladi; 4 ta o‘yinda 90 daqiqa harakat qildi; biror marta ketma-ket 90 daqiqa o‘ynamadi. Yuqori darajadagi himoyaviy sifatlari va mehnatsevarligisiz Shomurodov pressing reytingida yuqori o‘rinni egallay olmasdi, shunday rejimda unga ajratilgan vaqtdan unumli foydalana oldi.
Boshqa tomondan “Roma”da unga asosiy tarkibdan joy kafolatlanmagan, demak pressing-faollikni yuqori darajada ushlab turishga majbur. Ushbu jihati bilan o‘zbekistonlik hujumchi ligada yashirin yulduzlardan hisoblanadi. Unda to‘pni olib qo‘yish qobiliyati ham bor — 90 daqiqada to‘pni olib qo‘yish bo‘yicha eng yaxshi hujumchilardan biri (1,56).
Shomurodovning mehnatsevarligi — nafaqat himoyaviy o‘yinga foydali. Eldorning A Seriyadagi 8 ta goldan ikkitasi individual pressing natijasidir. Imkoni yo‘qdek ko‘ringan vaziyatlarda u imkoniyat ko‘ra oladi va raqibga bosim o‘tkazib, o‘z maqsadiga erishadi.
Ayniqsa, “Atalanta”ga qarshi o‘yin yorqinroq bo‘ldi. Ruslan Malinovskiy to‘pni orqaga, himoyachilarga oshiradi, Eldor oldida ikkita himoyachi bo‘lishiga qaramasdan bu noaniq oshirilgan to‘pga yuguradi:
Eldor pas noto‘g‘ri amalga oshirilganini, har qanday holatda ham himoyachi to‘pni o‘ziga to‘g‘rilab olishga qiynalishini tushundi. U raqibga bosim qilishni maqsad qildi:
Berat Gimshitidan to‘pni olib qo‘yishni uddaladi — uyog‘iga esa mahorat bilan to‘pni darvozaga joylab qo‘ydi.
Pressing uyushtirish bo‘yicha Shomurodov — ligada eng yuqori o‘rinda turadi. Isbot uchun uning alohida epizodlardagi harakatlarini raqamlarda ko‘rish kifoya.
Joze uni qadrlaydi. Uning tizimida yulduzlarga ko‘proq vazifalar yuklash mexanizmi bor, qoidaga ko‘ra ular qanot futbolchilari bo‘ladi (masalan, Eden Azar yoki Krishtianu Ronaldu). Portugaliyalik mutaxassis hujumchilarni hech qachon ishlardan ozod qilmaydi, hattoki u super yulduz bo‘lsa ham.
Mourinyo davrida ishimning asosiy qismi — jamoa to‘psiz harakat qilgan vaqtda raqiblardan to‘pni olib qo‘yishga urinish edi. Albatta, men gol uraman va uzatmalar amalga oshiraman, lekin himoyaga qaytishdan ham rohatlanish imkoniga ega bo‘laman, bu menga yoqadi.Yevro—2020 ning asosiy yulduzlaridan biri Alvaro Morata ham Mourinyoning himoyaviy o‘yini haqida iliq fikr bildirdi: “O‘yinga o‘zingni to‘liq bag‘ishlamasang, umuman o‘ynamaysan — aynan Joze shu fikrni menga singdirgan”.Harri Keyn, “Tottenhem” futbolchisi
Ikkinchi muhim lahza — o‘tish epizodlaridagi harakatlar. Mourinyo bu bosqichda futbolchilarning harakatlariga alohida e’tibor beradi. Portugaliyalik mutaxassis aynan shu lahzalar o‘yinda g‘alaba qozonish yoki mag‘lubiyatga uchrashni hal qiladi deb hisoblaydi. Balki zamonaviy futbolda bu tezis Joze faoliyatidagi eng yuqori cho‘qqiga erishgan davridagi kabi ahamiyatga ega emasdir, ammo bu jamoa va hujumchilar uchun muhim ekanligini inkor etmaydi.
Joze bu holatda hujumchilarning vazifasini “jamoaga bosimdan chiqib ketishi uchun yordam beradi” deb tushuntiradi. Bu ishni turlicha bajarish mumkin.
Didye Drogba — to‘pni ushlab turish orqali bosimdan xalos bo‘lish bo‘yicha etalon. Uzatmadan so‘ng to‘pni qabul qilib olib, darvozaga orqa qilgan holda sheriklari qarshi hujumga o‘tgunga qadar to‘pni ushlab turadi. Bu uslub bo‘yicha ivuarlik hujumchi dunyoda eng yaxshi edi. Keyn ham xuddi shu vazifani bajargan (u nafaqat to‘pni ushlab turgan, balki aylanib olib, darvozaga zarba ham bergan). Lekin vazifa bir xil — to‘ni ushlab turish.
“Ba’zi o‘yinlarda mening asosiy vazifam to‘pni ushlab turish bo‘ladi. Asosan jamoa yuqori bosim ostida bo‘lganda. Fol ishlab olishga harakat qilish yoki qolganlar hujumni qo‘llab quvvatlashini kutish uchun. Qarshi hujumlarda men albatta qaysidir jamoadoshim ochilishini bilgan holda hujumchi pozitsiyasiga o‘taman. Ko‘pincha bu imkoniyatdan unumli foydalana olaman”, — deydi Harri.
Shomurodov Mourinyoning bu ko‘rsatmasini bajarish uchun darvozaga orqa qilib yaxshi o‘ynay olmaydi. Baxtga qarshi Mourinyoning ikkinchi uslubi ham bor, Joze uni “raqib himoyachilarini kuchaytirish” deb ataydi.
“Diyego Kostada men qadrlaydigan juda ko‘p sifatlar bor. Uning xarakteri, harakatlari, yuqori pressingda bosim qilishni uddalay olishi tahsinga sazovor. U ochiq zonani topib, to‘pni oshirishni talab qiladi. Bu esa jamoaga bosimdan xalos bo‘lishga yordam beradi. Kostada jamoaga nafi tegadigan taktik sifatlar mavjud”, — deydi Mourinyo.
Maqsad o‘sha-o‘sha — pressingda yordam berish. Joze taktikasidagi hujumchining asosiy vazifasi. Kosta misolida buni boshqacha usulda bajarsa ham bo‘lishi mumkinligini ko‘rishimiz mumkin. Himoyachining orqasidan ochilib borish — bunda uzatma hujumchiga emas, ochiq zonaga oshiriladi, jamoa tezkor hujum qilish imkoniyatiga ega bo‘ladi.
Bunday vaziyatlarda Shomurodovning ochila olishi Kostani eslatib yuboradi. Muhim sifat — tezlik. Eldor buni juda yaxshi uddalay oladi. Shomurodov Kostadan emas, kumiri Fernando Torresdan bu jihatni o‘zlashtirgan: “Bolaligimda Fernando Torres va Didye Drogbalarning o‘yinini tomosha qilishni yaxshi ko‘rardim. Menga Torresning uslubi va Drogbaning o‘ziga bo‘lgan ishonchi yoqardi. Ularga o‘xshash uchun juda ko‘p mehnat qilaman”.
Drogba va Torres — yuqorida aytilgan ishlarni aynan shu ikki futbolchi yuqori darajada bajara olgan. Uslub bo‘yicha Eldor — bu Torres, Drogba emas (aynan uslub bo‘yicha, daraja bo‘yicha emas). U himoyachilar ortidan yaxshi ochila oladi, buning evaziga bosimdan xalos bo‘lishga yordam beradi.
“Jenoa”da ikkita hujumchi bir vaqtda maydonda bo‘lgan, shuning uchun Eldor yo to‘pni olish uchun orqaroqqa qaytishga majbur bo‘lgan yoki sherigi to‘p uzatishi uchun o‘zi ochilgan. Mourinyo ikkinchi uslubni talab qilsa kerak.
Jamoa to‘pni egallab oldi, Shomurodov sevimli zonasi tomonga yugurishga tayyor (o‘ng qanot va markaziy himoyachi orasidan). Raqib esa bu vaziyatda kerakli himoyalanish sxemasini tanlay olmadi, shekilli:
Yana qarshi hujum — bu safar Shomurodov boshqa qanotdan ochildi (ochiq zonaga chiqish uchun imkoniyat borligini sezdi, “Kalyari”ning chap qanot himoyachisi Xaralambos Likoyannis ortga qaytishga ulgurmadi):
Eldor bu epizodlarda yaxshi harakat qiladi. Mourinyo qo‘l ostida yanada yaxshiroq bo‘lishi mumkin. Romelu Lukaku Joze hujumchilarni rivojlanishida yordam berishini ta’kidlagandi. “Mourinyo jamoa uchun o‘ynashni o‘rgatdi. Bu pressing va pozitsiya tanlash bilan bog‘liq. Keyin men uning Harri Keyn bilan qanday ishlayotganini kuzatdim”, — deydi belgiyalik futbolchi.
Mourinyo idealida ikki detal bor — yugurish (Kosta misolida) va darvozaga orqa qilgan holda to‘pni ushlab turish (Drogba misolida). Albatta hujumchi bu xislatlardan birini egallashi kerak, lekin ikkalasini ham o‘zlashtirish foydali.
Eldorning o‘z vaqtida ochilishi jamoasining pozitsion hujumlarida yordam beradi. “Makkabi” darvozasiga urilgan gol Fabregas—Kosta tandemini eslatib yuboradi. Sesk rolida — Matias Normann.
Normann to‘pni erkin tarzda egallab oldi. Shomurodov buni ko‘rdi:
Shomurodov ertaroq yugurishni boshladi. Normann to‘pni egallayotgan mahalda Eldor harakatlanishni boshlagandi — bu esa noaniq vaziyatda himoyachini ortda qoldirishda ustunlik beradi:
Fabregas to‘pni egallab olganda Kosta doim shunday usulni qo‘llardi (ertaroq yugurishni boshlardi). Shomurodov ham shu harakatni Lorenso Pellegrini bilan birga bajarishi mumkin.
Umuman olganda Mourinyoning taktikasida pozitsion hujumlar uchun hujumchilarning vazifasi noaniq. Murabbiy bu borada kam ishlaydi, shuning uchun ko‘p narsa hujumchilarning o‘ziga, jamoadoshlari bilan o‘zaro bir-birini tushunishiga bog‘liq. Joze uchun gollar ssenariysi boshqa epizodlar orqali keladi.
Agar joylashuvning iloji bo‘lmasa, Mourinyo futbolchilarning individual qarorlariga ishonadi. Qiyin vaziyatlarda yuqori darajadagi ijodkor yarim himoyachilar yordam beradi (Fabregas, O‘zil va albatta Pogba). Jozening futbolida bunday o‘yinchilarga joy topiladi, garchi himoya chizig‘iga zarar yetsa-da, Mourinyo ushbu futbolchilarni qanday bo‘lmasin maydonga tushiradi.
Aynan hujumchilar uchun aniq talablar yo‘q. Qiyin vaziyatlarda gol ura olish — bu tizim uchun ajoyib bonus. Yana bir muhim jihat — Mourinyo jamoalari qanotdan jarima maydoni ichiga to‘pni oshiradi. Bunday vaziyatlarda hujumchi qanday harakat qilishi kerakligini Shomurodov yaxshi biladi.
Shomurodov Jekoning o‘rniga kelmadi, lekin bosniyalik futbolchining jamoadan ketishi Eldorga ko‘proq o‘yin amaliyoti berilishini kafolatlaydi
O‘tgan mavsumda “Roma” safida ikkita hujumchi bor edi — Edin Jeko va Borxa Mayoral. Paulu Fonseka rotatsiyadan unumli foydalandi va ikkala hujumchi ham maydonda deyarli bir xil o‘yin amaliyotiga ega bo‘ldi. Jeko barcha musobaqalarda 2419 daqiqa harakat qilgan bo‘lsa (38 o‘yin, 13 ta gol), Mayoralda — 2302 daqiqa (45 o‘yin, 17 ta gol).
Shomurodov rotatsiya uchun olindi — u Abraham va Mayoraldan keyingi uchinchi hujumchi. Ammo Eldorning maydondagi vazifasi ularnikidan farq qiladi, bu esa Mourinyoga tanlov imkoniyatini beradi. Joze Edin Jekoni asosiy hujumchi sifatida ko‘rayotgandi, lekin “Inter” hujumchini o‘z safiga qo‘shib oldi.
Romelu Lukaku “Chelsi”ga ketdi, Jeko esa “Inter”ga o‘tdi. Milan jamoasi to‘rt yildan buyon bosniyalik hujumchini o‘z safiga qo‘shib olish uchun urinardi. Luchano Spaletti va Antonio Konte Jekoni hujum chizig‘i uchun ideal variant deb bilardi. Endi u Simone Inzagi qo‘l ostida o‘ynash imkoniga ega bo‘ladi.
“Roma” Jeko ketganidan so‘ng “Chelsi”dan Temmi Abrahamni sotib oldi. Unga Mourinyo mavsum davomida 20 dan ortiq gol urish talabini qo‘yadi. Lekin “Roma” murabbiyi har doim ham hujumchilarni urgan gollariga qarab baholamaydi: “Egoist hujumchilarning muammosi shundaki, ular gol urmasa, maydonda o‘zlarini yo‘qdek hisoblaydi. Lekin boshqa turdagi hujumchilar borki, ular gol urmasa ham katta vazifalarni bajaradi. Harri Keyn bunga misol. Ueyn Runi ham hujumchi, lekin u hattoki yarim himoyada ham o‘ynashiga to‘g‘ri keldi. Bunday hujumchilar jamoaga ko‘proq yordam bera oladi”.
Jozening so‘zlarida o‘z gapini inkor qilish borligini sezish mumkin — avvaliga u gol muhim emas deyapti, keyin esa ko‘p gol uradigan super hujumchilarni sanab o‘tyapti. Mourinyoning jamoasida doim jamoaviy ishlarni gollar bilan uyg‘unlashtira oladigan hujumchilar bo‘lgan.
Shomurodov — alturistik hujumchi. Bu xislati portugaliyalik mutaxassisga yoqishi mumkin. Eldor zaxira futbolchisi sifatida mavsumni boshlashi mumkin, lekin Joze qo‘l ostida u o‘sishga erishadi.
“O‘tgan mavsumda men 8 ta gol urdim, endi esa 10—15 ta gol urmoqchiman. Bu oson bo‘lmasligini bilaman. Ushbu chempionatda bu vazifani bajarish qiyin, lekin meni endi yaxshi bilishadi”, — degan edi Shomurodov “Roma”ga o‘tishidan avval.
Endi esa yana bir maqsad qo‘shildi: “Yuqori darajadagi jamoa sharafini himoya qilaman, Vatanimda meni qo‘llab-quvvatlaydiganlar juda ko‘p. Ularning ishonchini oqlashga harakat qilaman”.
Shomurodov 19-avgust kuni “bo‘rilar” safida rasmiy debyutini o‘tkazishi mumkin. “Roma” Yevropa Konferensiyalar Kubogi saralash bahsi doirasida “Trabzonspor”ga qarshi bahs olib boradi. O‘yin O‘zbekiston vaqti bilan 22:30 da boshlanadi.
Izoh (0)