Maydondagi millionlar: dunyoning ayni vaqtdagi eng qimmat futbolchilari

Transfer bozori hech qachon barqaror bo‘lmagan. O‘yinchilarning transfer qiymati tez-tez o‘zgarib turadi. Bu futbolchining muvaffaqiyati, uning jamoadagi roli, qo‘lga kiritgan yutuqlari va ko‘plab boshqa faktorlarga bog‘liq. O‘z navbatida Transfermarkt portali ham muntazam ravishda o‘yinchilarning narxlarini yangilab turadi. Quyida dunyoning eng qimmat (transfer narxi 100 million yevro va undan yuqori) o‘yinchilari haqida hikoya qilinadi.

Kevin de BryuyneKlubi: “Manchester Siti”Yoshi: 30 daTransfer qiymati: 100 million yevro

Kevin de Bryuyne doimiy ravishda yuqori saviyani saqlab turibdi. 2018-yilning mayidan 2020-yilning apreligacha futbolchining transfer qiymati 150 million yevroni tashkil qilgan. Bu uning faoliyatidagi eng yuqori ko‘rsatkich edi. Hozirgacha belgiyalik futbolchining narxi 50 million yevroga arzonladi, ammo u shunga qaramay yuqori o‘rinlarda bormoqda. May oyidan beri yarim himoyachining hozirgi narxi o‘zgarmay turibdi. Ayni damda u dunyoning va “Manchester Siti”ning eng qimmat futbolchilaridan biri hisoblanadi. Qolaversa, Kevin Premyer Liganing ham eng qimmat besh futbolchisidan biridir. Belgiyalikning ko‘rsatayotgan o‘yini esa uni yana ma’lum muddat ushbu reytingda qoladi deb aytishga asos bo‘la oladi.

NeymarKlubi: “PSJ”Yoshi: 29 daTransfer qiymati: 100 million yevro

So‘nggi paytlarda Neymarning ham transfer narxi sekin-astalik bilan pasayib bormoqda. 2017-yilning oktabridan 2019-yilning dekabrigacha braziliyalik futbolchi 180 million yevroga baholangan edi. Bu uning faoliyatidagi eng yuqori ko‘rsatkich bo‘lgan. O‘shandan beri futbolchi muntazam ravishda, lekin sekinlik bilan narxini “yo‘qotmoqda”. May oyidan keyin esa “PSJ” vingeri yana 10 millionga arzonlashdi, ammo bu uning yuqori pog‘onada qolishiga to‘sqinlik qilmayapti. Ayni damda Neymar eng qimmat braziliyalik futbolchi bo‘lib turibdi. “PSJ” va Liga 1 da Kilian Mbappedan keyingi o‘rinda bormoqda. Vatandoshlari reytingida u eng yaqin ta’qibchisi Markinyosdan sezilarli darajada oldinda, himoyachi 75 million yevroga baholangan.

Muhammad SalohKlubi: “Liverpul”Yoshi: 29 daTransfer qiymati: 100 million yevro

Saloh bu ro‘yxatga 10 million yevroga arzonlagan holda kirdi. Ammo keyingi reytingda misrlikning ko‘rsatkichi hozir ko‘rsatayotgan o‘yinidan kelib chiqib, yaxshilanish ehtimoli juda yuqori. Ehtimol, “qizillar” vingeri 2018-yilning mayidan 2020-yilning apreligacha bo‘lgan muddatdagi narxiga ham qaytishi mumkin. O‘shanda futbolchi 150 million yevroga baholangan va bu uning faoliyatidagi eng yuqori ko‘rsatkich edi. Ammo hozir ham u eng qimmat misrlik futbolchi, “Liverpul”ning eng qimmat o‘yinchisi, shuningdek, APLning eng qimmat futbolchilaridan biri bo‘lib turibdi. Bundan tashqari, Muhammad Saloh Neymar bilan birga 1992-yilda tug‘ilgan eng qimmat futbolchilar reytingini ham boshqarmoqda.

Romelu LukakuKlubi: “Chelsi”Yoshi: 28 daTransfer qiymati: 100 million yevro

“Inter”ni tark etgach, Lukaku 10 million yevroga qimmatladi. Ammo belgiyalik strayker aynan milanliklar safidagi o‘yinlari evaziga 100 million yevroga ko‘tarilgandi, bu uning faoliyatidagi eng yuqori ko‘rsatkichdir. Hujumchining avvalgi transfer rekordi 2019-yilning dekabrida o‘rnatilgan edi. O‘shanda futbolchi 90 million yevroga baholangandi. Hozirda Romelu “Chelsi”ning eng qimmat futbolchisi va Premyer Liganing eng qimmat besh futbolchisidan biri sanaladi. Bundan tashqari, Lukaku de Bryuyne bilan birga Belgiya terma jamoasining eng qimmat futbolchilari hisoblanadi. “Chelsi”dagi o‘yinlari uning transfer narxiga qanday ta’sir ko‘rsatishini esa vaqt ko‘rsatadi.

Jek GrilishKlubi: “Manchester Siti”Yoshi: 26 daTransfer qiymati: 100 million yevro

Grilishning hozirgi bozor qiymati uning faoliyatidagi eng yuqori ko‘rsatkichdir. Oxirgi yangilanishdan beri “Manchester Siti” vingeri 35 million yevroga qimmatlashgan. Jek hozirda Kevin de Bryuyne bilan birga “Siti”ning eng qimmat futbolchisi va ikkinchi eng qimmat ingliz o‘yinchisi hisoblanadi. U, shuningdek, Premyer Liganing ham eng qimmat besh futbolchisidan biri. Yozda “Manchester Siti” uning transferi uchun “Aston Villa”ga 117 million yevro to‘ladi. Ko‘pchilik mutaxassislarning fikricha, “shaharliklar” vinger uchun juda ko‘p pul to‘lab yuborgan. Jek haqiqatan ham yangi klubdagi faoliyatini juda yorqin boshlagani yo‘q, lekin unda hali o‘ziga sarflangan kichkina bo‘lmagan mablag‘ni oqlash uchun yetarli vaqt bor.

Harri KeynKlubi: “Tottenhem”Yoshi: 28 daTransfer qiymati: 120 million yevro

Keyn 2020-yilning aprelidan beri joriy bozor qiymatida qolmoqda va shu bois dunyoning eng qimmat uch o‘yinchisidan biri sifatida e’tirof etiladi. 2018-yilning mayidan 2020-yilning apreligacha hujumchi 150 millionga baholangan. Harri “Tottenhem”, Angliya va Premyer Liganing eng qimmat futbolchisi hisoblanadi. Shuningdek, u dunyoning eng qimmat o‘yinchilari ichida 3-o‘rinda qayd etilgan. Keynning mavsum boshidagi unchalik yorqin bo‘lmagan o‘yinini hisobga olinsa, keyingi reytinglarda uning o‘rni “qimirlab” qolishi ham mumkin: Premyer Liganing 10 o‘yinida bittadan gol va assist 120 million yevrolik hujumchi uchun yaxshi natija emasligi haqida bahslashishga hojat yo‘q, shunday emasmi? Ammo kim bilsin, ehtimol, Harri tez orada yana avvalgi (odatdagi) darajasiga qaytar.

Erling HolandKlubi: “Borussiya D”Yoshi: 21 daTransfer qiymati: 150 million yevro

Holand doimiy ravishda ham o‘yin borasida, ham transfer qiymati bo‘yicha o‘sib bormoqda. Shu kunga qadar hujumchi 20 million yevroga qimmatlashgan. Futbolchining hozirgi qiymati uning faoliyatidagi eng yuqori ko‘rsatkichdir. Erling ayni damda “Borussiya D”, Bundesliga va Norvegiya terma jamoasining eng qimmat futbolchisi hisoblanadi. Bundan tashqari, u dunyoning eng yuqori narxli ikki futbolchisidan biridir. Holandni yorqin kelajak kutayotganiga hech kim shubha qilmaydi. Navbatdagi mavsumning asosiy intrigalaridan biri ham yosh, ammo allaqachon yulduz bo‘lib ulgurgan hujumchining faoliyatini qayerda davom ettirishi bo‘lib turibdi. Variantlar talaygina va ularning barchasi top-darajadagi jamoalardan.

Kilian MbappeKlubi: “PSJ”Yoshi: 22 daTransfer qiymati: 160 million yevro

Holanddan farqli o‘laroq, Mbappe hamon shu yilning may oyida belgilangan transfer qiymatida qolib kelmoqda. Bundan tashqari, bu uning eng yuqori ko‘rsatkichi emasligini ham qo‘shimcha qilish kerak. 2018-yilning dekabridan 2020-yilning apreligacha hujumchi 200 million yevroga baholangandi. 40 million yo‘qotganiga qaramay Kilian hozirda “PSJ”, Liga 1 va Fransiya terma jamoasining eng qimmat futbolchisi, dunyoning eng qimmat markaziy hujumchisi va shunga mos ravishda sayyoraning eng qimmat o‘yinchisi hisoblanadi. Mbappe ushbu yuqori reytingda birinchi bo‘lib turgan bo‘lsa-da, Holand timsolida jiddiy raqobatchi bilan bahs olib borishi kerak. Ko‘pgina mutaxassislarning fikriga ko‘ra, aynan bu yigitlar Krishtianu Ronaldu va Lionel Messi davridan keyin uzoq yillar “Oltin to‘p” uchun kurashda bir-biriga asosiy raqib bo‘ladi. Buning qanchalik haqiqat ekani keyinchalik ma’lum bo‘ladi. Hozircha esa hamma narsa shunga ishora qilmoqda.