Mamlakat oliy taʼlim muassasalarida talabalarning 3–7 foizi fanlarni yetarlicha o‘rgana olmayapti. Oqibatda ular kursni qaytadan o‘qishga majbur. Bu haqda 26-mart kuni Toshkent shahrida o‘tkazilgan matbuot anjumanida Oliy taʼlim, fan va innovatsiyalar vazirligi departament direktori Abduvali Xoliqov maʼlum qildi.
Abduvali Xoliqovning aytishicha, darslarni o‘zlashtira olmagan talabalar o‘qishdan haydalmaydi. Ularga keyingi yildan qoldirilgan kursida qaytadan o‘qish imkoni beriladi.
“Darslarni o‘zlashtirmagan taqdirda talabani to‘liq kursda qoldirish belgilangan. U talabalik safidan chiqarilmaydi, faqatgina kursda qoldiriladi. Keyingi yil qoldirilgan kursidan o‘qishni davom ettiradi. Respublika bo‘yicha oliy taʼlim muassasalarining 3–7 foiz talabalariga shunday chora ko‘riladi. Bu avvalgi tizimdagi kabi talabani jazolash uchun belgilangan. Lekin hozirda talabaga o‘qishni qayta tiklash yengillashtirilgan.
Talaba ariza berib o‘tirmasdan, to‘g‘ridan to‘g‘ri buyruq asosida, bir yillik muddat kelgandan keyin o‘qishni avtomatik davom ettirishi uchun kursda qoldirish tizimi yo‘lga qo‘yilgan. Amalda talabalar safidan chetlashtirish tartiblari 393-sonli qarorda belgilangan. Masalan, agar talaba ko‘p dars qoldirsa, shunday chora ko‘rilishi mumkin. Hujjatda qancha dars qoldirsa, ogohlantirilishi va talabalik safidan chiqarilishi ko‘rsatilgan yoki talabaning o‘z xohishi bilan talabalik safidan chetlashtirish mumkin. Yana bir necha salbiy holatlarda shunday chora ko‘riladi”, dedi vazirlik masʼuli.
Avvalroq o‘zlashtirish ko‘rsatkichi 3,5 va undan yuqori bo‘lgan ayrim toifadagi talabalarga keyingi o‘quv yili uchun foizsiz taʼlim krediti ajratilishi maʼlum qilingandi.
Izoh (0)