O‘zbekiston prezidenti Shavkat Mirziyoyev va Pokiston bosh vaziri Shahboz Sharif 30-mart kuni telefon orqali muloqot qildi. Davlat yetakchilari Ramazon hayiti (Iyd al-Fitr) bayrami munosabati bilan bir-birlarini samimiy qutladi. Bu haqda prezident matbuot xizmati xabar berdi.
Siyosatchilar O‘zbekiston va Pokiston xalqlariga tinchlik-osoyishtalik, farovonlik va ravnaq tiladi. Fevral oyida Pokiston bosh vazirining O‘zbekistonga tashrifi davomida erishilgan kelishuvlarni “yo‘l xaritasi”ga muvofiq amalga oshirish muhokama qilindi.
Vazirliklar, idoralar va tarmoqlar darajasidagi muloqotlar faollashgani va almashinuvlar samarali tus olganiga e’tibor qaratildi. Mart oyida Islomobod shahrida O‘zbekiston oziq-ovqat mahsulotlari ko‘rgazmasi muvaffaqiyatli o‘tkazildi. Aprel oyidan esa Lahorga qo‘shimcha aviareyslar yo‘lga qo‘yilishi rejalashtirilgan.
Qo‘shma loyihalarning ijrosini ko‘rib chiqish va ularni jadallashtirish choralarini ko‘rish uchun Hukumatlararo komissiyaning navbatdagi yig‘ilishini 2025-yilda o‘tkazish muhimligi ta’kidlandi. O‘zbekiston va Pokiston yetakchilari mintaqa kun tartibidagi dolzarb masalalar yuzasidan ham fikr almashdi.
Ma’lumot o‘rnida, Shavkat Mirziyoyev 30-mart kuni Turkiya prezidenti Rajab Toyyib Erdo‘g‘on bilan telefon orqali muloqot qilgandi. Prezidentlari bir-birlarini Ramazon hayiti bilan tabriklagan. Tomonlar xalqaro ahamiyatga molik dolzarb masalalar yuzasidan ham fikr almashgan.
Izoh (0)