Saudiya Arabistonining “An-Nassr” klubi va Krishtianu Ronaldu o‘rtasidagi yangi shartnomaga ko‘ra, portugaliyalik futbolchi jamoaning 5 foizlik ulushiga ega bo‘ladi, deb xabar bermoqda Marca.
Avvalroq OAVda Ronaldu “An-Nassr” bilan yiliga 200 milliondan yevrodan ko‘proq miqdordagi maoshni nazarda tutuvchi yangi shartnomaga kelishib olgani haqida xabarlar tarqalgan edi. Shartnomaga ko‘ra, futbolchi maydondagi o‘yinlari uchun taxminan 164 million funt sterling, shuningdek, maydon tashqarisidagi faoliyatlaridan yana 49 million funt ishlab topadi. Bundan tashqari, unga klubning 5 foiz ulushiga egalik huquqi ham beriladi. Yangi kelishuv 2026-yilning iyuniga qadar amal qiladi. Amaldagi shartnoma joriy mavsum oxirida yakunlanadi.
5-fevral kuni Ronaldu 40 yoshga to‘ladi. U “An-Nassr” safida 2023-yilning yanvar oyidan buyon o‘ynab kelmoqda. Shu vaqt mobaynida portugaliylaik futbolchi Saudiya klubi tarkibida 90 ta o‘yin o‘tkazib, 81 ta gol urishga muvaffaq bo‘ldi. Joriy mavsumda 20 ta uchrashuvda 17 ta gol kiritdi.
Ronaldu Yevropa chempioni, Portugaliya terma jamoasi safidagi eng muvaffaqiyatli futbolchilardan biri, besh karra “Oltin to‘p” sohibi va rasmiy o‘yinlarda dunyo futboli tarixidagi eng yaxshi to‘purar hisoblanadi.
Izoh (0)